Categoría: +TEATRO

Dirixido a: PRIMEIRA INFANCIA

Duración do espectaculo: 35min

Persoa representante : URDIME, S. COOP. GALEGA

Datos de contacto : 619 920 335 - comunicacion@urdime.net

Páxina web do grupo : https://urdime.gal/espectaculos/Meco%20e%20Sono/

Sinopsis da compañia :

Xarope Tulú é unha compañía de teatro fundada hai dez anos, en 2015, pola actriz Atenea García e polo músico e escenógrafo Nicolás Zamorano. As súas propostas intentan achegar entre si as diferentes linguaxes escénicas: a interpretación actoral, a narración oral ou o teatro de obxectos. Xarope Tulú considera que a experiencia escénica permite medrar dun xeito libre e creativo, favorece o descubrimento doutros mundos posibles e provoca a creación dun espazo para a reflexión. Entre algunhas das súas pezas atópase Lingoreteira, Rilla rilla e A teteira de Kabul, peza finalista a mellor proposta de monicreques nos Premios María Casares 2024. A súa última produción é Meco e Sono, un conto de arrolos para a primeira infancia. A escritora e xornalista Xiana Arias conta con quince anos de experiencia como locutora da Radio Galega en programas como Diario Cultural e Onda Vital e recentemente creou para a compañía de teatro Berrobambán o podcast Mulleres que viven soas. Tamén é a voz da protragonista da colección de audiolibros infantís Sira e o Robot e forma parte do grupo de poesía escénica e performance sonora Clo Plas. Como escritora publicou os libros de poemas Ortigas e Acusación e o relato As Tigresas no volume O ano do Tigre. Meco e Sono é a súa primeira achega á dramaturxia infantil e a súa versión en conto ilustrado publicarase nos vindeiros meses.

Sinopsis do espectaculo:

Meco e Sono é un novo espectáculo de narración oral, teatro de bonecos e creación sonora en directo: un conto de arrolos para a primeira infancia. Nesta ocasión, Xarope Tulú únese á dramaturxia, música e voz en directo da escritora e xornalista radiofónica Xiana Arias. O resultado é unha sensorial e coidada proposta para ás máis pequenas, un espectáculo dirixido a nenos e nenas de menos de 3 anos que favorece a vivencia positiva do galego. Con Meco e Sono, entre outras cousas as familias e as máis pequenas poderán escoitar e aprender cancións de arrolo en galego, normalizando así o uso da lingua no ámbito familiar e en situacións tan cotiás como o momento de ir durmir. Por outro lado, a peza abre unha xanela para observar como os personaxes de ficción Meco, Sono e Noite falan en galego entre elas e tamén con Fedello, un neno pequeno que expresa as súas emocións, canta, fala e xoga en galego e se relaciona tamén na nosa lingua coas súas novas amizades. Meco e Sono é unha peza que promove a normalización do uso do galego nas idades máis temperás, unha etapa crucial no desenvolvemento lingüístico: cando están aprendendo a falar a e a relacionarse co mundo que as rodea. A peza abre a porta para que o público asistente (as pequenas e tamén as súas familias) afiancen o galego como lingua materna nalgúns casos e empecen a empregalo de xeito normalizado noutros. ‘Fedello é un bebé que non dorme. Parece que lle teme á Noite. Pero a Noite só quere coidalo e que descanse. Para iso envía a dúas amigas para que lle axuden a durmir: Meco e Sono. Cando Fedello di: “teño meco, teño sono’” aparecen as dúas ao seu carón para mexelo e cantarlle uns arrolos. Meco é luminescente e se a vaca fala Mu, ela cando o aperta colle o M e fai MMMMMMMMMMMMM. Sono ten os ollos pechos e anda como bailando, a cámara lenta abanea, ten a pel como de manta e sempre lle canta EAEAEA. Coa axuda de Meco e Sono o noso Fedello non só consegue acougar e durmir senón tamén ser amigo da Noite.’ Meco e Sono é un baile coas palabras acompañadas de música en directo, onde as repeticións, os sons e os contos de arrolos son ferramentas estimulantes para que a cativada normalice o uso do galego para comunicarse, expresarse e relacionarse. A través da peza poderán aprender vocabulario e estruturas lingüísticas e interiorizarán que o galego é unha lingua válida para expresarse en todos os contextos: promoverá unha relación afectiva co idioma que facilitará a súa su aprendizaxe e uso de xeito espontáneo. Meco e Sono é a primeira achega á dramaturxia infantil da xornalista e escritora Xiana Arias e a súa versión en conto ilustrado publicarase nos vindeiros meses con ilustracións de Lúa Gándara.

Caché con IVE : 1340.0 €

Caché + produción técnica con IVE : 1340.0 €

Técnica