Esta axenda común das Nacións Unidas articúlase ao redor de 17 grandes obxectivos, dos que emanan un total de 169 metas cuxo fin último é a erradicación da pobreza e a fame no mundo, a mellora dos niveis de benestar da cidadanía, a igualdade de xénero, a protección do medio ambiente, a educación inclusiva e de calidade, unha xestión sostible da auga, traballo decente para toda a cidadanía e promover decididamente a innovación.

A Deputación de Pontevedra leva meses traballando na implantación dos Obxectivos de Desenvolvemento Sostible na provincia co triplo reto de:

• Involucrar os concellos e os axentes sociais no cumprimento dos ODS
• Promover o liderado local para o cumprimento da Axenda 2030
• Reducir as desigualdades

A institución provincial emprega un enfoque local para ser global, abordando as problemáticas máis próximas identificadas polos ODS e aplicando medidas e programas concretos que contribúen a afrontar os grandes desafíos do planeta de forma conxunta co resto de actores implicados nesta gran transformación económica e social.