A Deputación de Pontevedra mantén aberto ata o vindeiro martes 8 de marzo o prazo para presentar artigos aos premios #MulleresQueOpinan, uns galardóns cos que se pretende promover o exercicio da opinión xornalística por parte das mulleres e fomentar o nacemento dunha nova canteira de opinadoras. Serán premiados con 1.000 euros os mellores artigos de opinión escritos en galego e en castelán sobre as temáticas que se abordaron na terceira edición do encontro “As mulleres que opinan son perigosas”, que se celebrou os días 14 e 15 de marzo no Teatro Principal de Pontevedra.

Poderán presentarse aos Premios #MulleresQueOpinan, que promove a institución provincial e o Concello de Pontevedra, artigos de opinión sobre a propia experiencia como espectadora ou asistente, así como as temáticas que nel se abordaron, tanto nos relatorios como nas roldas de preguntas. O único requisito é que co propio texto quede acreditada a asistencia ao foro.

Os artigos presentados, que teñen que ser orixinais, deben contar cun titular e corpo cunha extensión máxima de 3.000 caracteres (sen contar os espazos). Estes poden ser tanto inéditos como de xornalistas que cubriran as xornadas do foro e publicaran os seus textos nos medios que traballan. As bases están dispoñibles no Boletín Oficial da Provincia de Pontevedra e as propostas deberán presentarse preferiblemente a través da Sede electrónica da Deputación.