Máis de 300 persoas maiores de cincuenta anos de trinta concellos da provincia gozarán entre este domingo 19 e o venres 24 de novembro do programa “Depotermal” da Deputación de Pontevedra, con estadías no Hotel Carlos I Silgar en Sanxenxo, no Gran Talaso Hotel Sanxenxo, no Hotel Spa Norat Torre do Deza en Lalín e nas Termas de Cuntis; este último é o fixado para a estadía diúrna. Durante a súa estancia poderán gozar de actividades de animación sociocultural e de tratamentos gratuítos, coma sesións monitorizadas de activación muscular e articular, tratamentos dixestivos con augas medicinais, piscina terapéutica ou actividades para mellorar a mobilidade e a circulación, combater a dor e a inflamación, e reducir o estrés, entre outros moitos.

Deste xeito, este domingo comezan as estadías con pernoctación de tres grupos, que se aloxarán nos establecementos hoteleiros ata o venres 17 de novembro. A primeira destas expedicións, que conta con noventa persoas inscritas dos concellos da Cañiza, A Lama, Baiona, Cangas, Cerdedo-Cotobade, Covelo, Crecente, Gondomar, Nigrán, Poio, Pontevedra, O Porriño, Redondela, Salceda de Caselas, Salvaterra de Miño, Tomiño e Vigo, partirá rumbo ao Hotel Carlos I de Silgar, en Sanxenxo. O segundo grupo, que irá ao Gran Talaso Hotel Sanxenxo, está composto por 57 persoas de Cambados, Cerdedo-Cotobade, Gondomar, Moraña, Nigrán, O Porriño, Tui e Vigo. Por último, 43 persoas dos concellos de Cangas, Catoira, Marín, Meaño, Moaña, Nigrán, O Grove, O Porriño, Pontevedra, Sanxenxo, Vigo e Vilagarcía de Arousa gozarán dunha estadía no Hotel Spa Norat Torre do Deza en Lalín.

No que atinxe ás saídas diúrnas, 112 persoas dos concellos de Bueu, Cangas, Cerdedo-Cotobade, Forcarei, Moaña, Moraña, Ponte Caldelas, Redondela, Soutomaior e Vigo gozarán dos tratamentos das Termas de Cuntis desde o luns 20 de novembro ata o venres 24.

O programa de termalismo e saúde da Deputación de Pontevedra, dirixido ás persoas maiores de cincuenta anos, xubiladas, pensionistas, cun recoñecemento do grao de diversidade igual ou superior ao 65 % ou que teñan acreditada a necesidade dun respiro familiar, ten como finalidade facilitarlles ás veciñas e veciños da provincia o acceso a actividades de ocio saudable e envellecemento activo en establecementos hostaleiros. Ademais, pretende ser un programa dinamizador da economía da provincia, ao impulsar a creación e o mantemento de postos de traballo no sector turístico durante os períodos de menor actividade ao desestacionalizar a demanda.

“Depotermal” conta con dúas modalidades: unha diúrna, mediante a que as persoas beneficiarias asisten aos establecementos termais durante cinco días consecutivos, e outra con pernoctación, a través da que se ofrece unha estancia de seis días e cinco noites. En total, beneficiaranse 2.447 persoas, das que 664 aproveitarán a asistencia diúrna e 1.783, a asistencia con aloxamento.