“A nosa voz, o noso espazo, os nosos dereitos”, o lema da Deputación para este 8M, xa viste de reivindicación feminista as fachadas das sedes provinciais en Pontevedra e Vigo. A presidenta Carmela Silva, o vicepresidente César Mosquera e deputadas e deputados provinciais despregaron este venres a lona co lema desde o balcón da fachada do Pazo Provincial, nun acto que, ao igual que en Vigo, marca o arranque da ampla programación coa que ao longo deste mes a institución provincial seguirá a defender a igualdade e a loitar polos dereitos das mulleres.

Carmela Silva quixo incidir en que “fronte aos discursos do negacionismo da desigualdade, das violencias machistas e as dificultades que temos as mulleres, queremos dicir claro que aí está a nosa voz, non imos permitir perder os espazos gañados e imos seguir traballando por conseguir a metade de todo”. “Dende logo -afirmou- os nosos dereitos van ser defendidos polas mulleres e tamén polos homes que nos acompañan nesta loita. Na Deputación este é un proxecto colectivo de todo o Goberno e imos loitar porque ninguén sexa capaz de arrincar ningún paso avanzado”. Na mesma liña se expresou o vicepresidente provincial, César Mosquera, que lembrou que unha máxima da Deputación “é ter unha sensibilidade especial e unha liña política centrada na igualdade”.

Tras despregar as pancartas, todo está preparado xa nas sedes provinciais para as accións do mesmo 8 de marzo. A cita en Pontevedra será ás 11.00 horas, no Pazo Provincial, coa intervención artística denominada “Alguén aquí?”, que protagonizará a mestra, escritora e artista Carmen Quinteiro, acompañada das músicas Su Garrido e Sheila Patricia. Trátase dunha acción, como avanzara a presidenta provincial Carmela Silva na presentación da programación, que vai supoñer “un golpe duro para que a sociedade reflexione sobre a necesidade de tomar partido pola igualdade”. A peza animará a estar alerta “e reafirmar a urxencia de non baixar a garda en defensa dos dereitos das mulleres” e para iso panelarase e decorarase a porta central do Pazo Provincial con cintas de baliza de perigo e a acción contará con ambientación sonora e visual.

Pola tarde, ás 17.00 horas, arrancarán os actos centrais en Vigo, que contarán cunha performance e a apertura de dúas exposicións na sede da Deputación na rúa Eduardo Chao. A primeira acción, que se desenvolverá na rúa, é obra das artistas Andrea Mosquera e María Roja, e leva por título “2,2 quilómetros de alento”. Será unha performance que terá lugar entre o Xulgado de Violencia Sobre a Muller e a sede provincial, un tramo coa citada distancia a través do que as dúas mulleres, cargadas con bolsas da compra, irán deixando ao seu paso laídos de auxilio que se mesturarán ata perderse na paisaxe sonora urbana. As creadoras da peza explicaron na presentación que a acción será na rúa “para darlle a oportunidade á xente de estar en contacto coa arte en espazos que non son habituais”.

A acción rematará na sede da Deputación en Vigo, onde de seguido inauguraranse dúas exposicións. Na sala Rosalía de Castro a artista Puri Díaz amosará en “A muller da miña vida” fotografías que supoñen “un canto coral da memoria” desde o plano persoal, mentres que na sala Maruja Mallo, abrirase a mostra de fotografía, escultura e instalación “Dar alento” de Ofelia Cardo, con pezas centradas na intersección entre feminismo e ecoloxía, que “entrelazan a histórica opresión sobre a natureza coa que sofren as mulleres”.

Galerias de imaxes