A Deputación de Pontevedra ultima estes días o prazo para que os deportistas de elite da provincia soliciten as axudas que a institución provincial pon á súa disposición, emparelladas á obtención do recoñecemento na categoría de deportista de alto nivel (DEPO_DAN, ou DEPO_DAN+ no caso de deportistas con discapacidade) e deportista de alto nivel de base (DEPO_TALENTO). A liña está dotada dun crédito de 275.000 euros, o que supón un 10% máis en comparación co que percibían co goberno provincial anterior, co fin de contribuír ao financiamento da súa actividade competitiva e á preparación técnica das e dos deportistas destacados da provincia.

As dúas liñas das axudas provinciais están divididas en subcategorías, en función dos resultados obtidos polos beneficiarios potenciais durante o ano pasado. No caso da liña DEPO_DAN (A) ou DEPO_DAN+ (A+), na que tamén poderán obter recoñecemento persoas adestradoras ou xuízas-árbitro, existen catro escalas. Obterán as contías máximas (2.000 € ou 3.000 € no caso de discapacidade) quen obtivesen entre un primeiro ou un terceiro posto nun campionato do mundo, baixando progresivamente ata os 500 ou os 1.000 euros pola obtención dun cuarto posto en adiante nun campionato de España ou entre un primeiro e un terceiro posto no campionato galego. No caso da liña DEPO_TALENTO (B) existen tres escalas, que oscilan entre os 1.200 e os 500 euros, e está reservada unicamente para deportistas nados entre os anos 2007 e 2012.

O prazo para que os deportistas nacidos ou empadroados na provincia soliciten as axudas remata o próximo martes 17 de setembro. Coas axudas, a Deputación contribúe a que poidan custear os gastos derivados dos adestramentos, concentracións, competicións e viaxes, que poden supoñer un obstáculo para o desenvolvemento axeitado de carreiras profesionais complementarias ás súas carreiras deportivas. As bases pódense consultar no Boletín Oficial da Provincia de Pontevedra.