A Deputación de Pontevedra abre este luns 16 de setembro o prazo de inscrición para participar nas últimas rutas da actual edición do programa provincial +Bosques. Serán en total oito percorridos que se celebrarán todos os sábados e domingos do mes, desde o sábado 5 en cabo Udra (Bueu) ata o domingo 27 no pazo de Lourizán (Pontevedra). Á falta de coñecer a resposta da cidadanía ás últimas quendas, a institución provincial pecha esta edición cun grande éxito de participación, conseguindo esgotar en cuestión de minutos todas as prazas dispoñibles para asistir ás rutas entre os meses de xuño e setembro.

O programa da Deputación vén ofertando ao longo deste período un total de 40 itinerarios por sete espazos naturais tanto da costa como do interior da provincia, co fin de poder coñecer a variedade de ecosistemas ricos en biodiversidade de Pontevedra. Estas últimas quendas de +Bosques no mes de outubro celebraranse en cabo Udra (Bueu) o sábado 5 de setembro, no río Almofrei (Pontevedra) o domingo 6, na illa de Tambo (Poio) o sábado 12, no lago Castiñeiras (Marín e Vilaboa) o domingo 13 e o sábado 26, no pazo de Lourizán (Pontevedra) o sábado 19 e o domingo 27, e no río Xabriña (Covelo) o domingo 20 de setembro. As persoas interesadas deberán cubrir este luns a partir das 9:00 horas da mañá un formulario en liña, indicando ata un máximo de tres acompañantes.

As rutas concíbense como unha experiencia chea de estímulos para comprender o método de aplicación do “baño de bosque” e a conexión directa en e coa natureza. Promoverase  a estimulación sensorial a través dos cinco sentidos, así como exercicios físicos e psicolóxicos para comprender, entender e fortalecer os lazos co medio natural da provincia.

Xornada de degustación de cociña silvestre

O broche de ouro do programa +Bosques será unha xornada de degustación de cociña silvestre que se celebrará durante o mes de novembro, cando xa remataron os percorridos. Esta actividade, de tres horas de duración, estará aberta a todas as persoas participantes nos preto de 40 “baños de bosque” que organiza a Deputación entre xuño e outubro. Consistirá nunha recollida de froitos e vexetais silvestres comestibles dos bosques da provincia de Pontevedra, coa súa respectiva identificación e degustación.