200 persoas participarán este domingo nos arredores do campo de fútbol da Bouza, na Illa de Arousa, na última actividade do programa da institución provincial “Depo Orienta”. A través desta iniciativa, que esgotou a totalidade das prazas ofertadas en menos de 24 horas, os participantes deben realizar, no menor tempo posible e contra o reloxo, un percorrido marcado no terreo por puntos de control e coa única axuda dun mapa.
 
A actividade realizarase nas inmediacións do campo de fútbol A Bouza da Illa de Arousa, situado nunha contorna natural con praias como Barbafeita ou Area da Secada. Os participantes competirán en tres categorías en función da dificultade técnica e da distancia: xestiñas (para nenos acompañados dunha persoa adulta), xestas (nenos maiores ou persoas adultas de xeito individual ou en grupo) e xesteiras (nenos ou persoas adultas con coñecementos de orientación, de xeito individual ou en grupo), de 2, 3 e 4 km respectivamente.

Coa “Depo Orienta” pola Illa de Arousa deste domingo remata esta iniciativa enmarcada no calendario de actividades deportivas de verán da Deputación de Pontevedra. A da Illa de Arousa é a terceira e última proba do programa, despois das celebradas no Monte Aloia (Tui) o 16 de xullo e no Monte Vixiador (Redondela) o 17 de setembro nas que se deron cita outras 400 persoas.