O Museo de Pontevedra e Editorial Galaxia poñen en marcha o primeiro Foro Grial - Galicia 2050, unha iniciativa que pretende crear espazos para imaxinar futuros posibles en diferentes ámbitos. O encontro terá lugar este xoves 7 de novembro de 16:30 a 19:30 horas no Edificio Castelao, co lema ‘Pensar para Adiante. Culturas, Artes e Identidades’. Está coordinado por Agar Ledo Arias e María López Sández.

O 1º Foro Grial - Galicia 2050 inclúe tres relatorios, a cargo de figuras destacadas da cultura e o pensamento. Germán Labrador exporá “A vocación dos estupefacientes. Sete teses sobre a relación entre imaxinación, cultura, memoria e esperanza na Galiza actual”. A partir da célebre frase de Castelao, en que a posibilidade dunha cultura que traballe pola emancipación individual e colectiva se enfronta a unha cultura que traballa para a neutralización e o ensimesmamento, o investigador e comisario galego preguntarase polos horizontes da sociedade e da cultura galegas nun contexto de crise ecosistémica, cambio xeopolítico e peche autoritario dos estados europeos.

Manuel Olveira achegarase ao futuro da arte coa conferencia “Futuro sen pasado? Futuros perentorios e pasados inacabados”. O director do MUSAC de León propón imaxinar futuros doutra maneira tendo en conta pasados que aínda non se atenderon nin se cumpriron, como a emigración, a ditadura e a transición, a subalternidade, a repolitización e democratización da sociedade, a produción de relatos enraizados no contexto e o fortalecemento da estruturas da arte.

A terceira cita da tarde será unha conversa entre Carme Adán e Lourdes Méndez, co título “Existe a comunidade?”. A problemática das identidades, dende o social ao subxectivo, será unha das cuestións centrais desta conversa entre dúas pensadoras contemporáneas que entenden que construír comunidades esixe manter ou reconstruír relación e obrigas sociais. Para pensar o futuro hai que preguntarse desde onde e con quen o pensamos, sen esquecer a transmisión interxeracional dos coñecementos teóricos e dos saberes prácticos. O foro pecharase coas intervencións do público e unha mesa de debate moderada por Agar Ledo.