A Deputación de Pontevedra continúa desenvolvendo os obradoiros de Provincia activa, programa co que a institución provincial impulsa o envellecemento activo das persoas maiores da provincia, fomentando a súa participación para crear espazos de encontro e intercambio de experiencias. Só esta semana, entre os días 16 e 21 de setembro, comezarán 15 novos obradoiros que mobilizarán un total de 256 veciños de 14 concellos da provincia.

Os primeiros obradoiros serán este luns 16 de setembro, cando 15 persoas da Unión Polideportiva Bolos da Carrasca, de Nigrán, comezarán unha acción de pandeireta e canto tradicional. Tamén 15 persoas da Asociación O Can de San Roque, de Forcarei, participarán nun curso de teatro, 21 da Asociación de Veciños de San Roque (Vigo) nun de ximnasia de mantemento, 16 persoas da Asociación de Veciños de Santo Andrés de Barrantes (Ribadumia) nun sobre conservación da memoria, e 15 da Asociación de Enfermos de Artrite de Pontevedra (con sede en Redondela) nun curso de musicoterapia.

O martes 17 de setembro dará comezo un curso de pilates coa participación de 16 persoas da Asociación Cultural Xida, no Rosal, mentres que o mércores 18 de setembro será o inicio doutras tres accións: ximnasia de mantemento con 24 usuarios da sede de AFAGA (Asociación de Familiares de Enfermos de Alzhéimer e outras demencias) en Salceda de Caselas, pilates para 16 usuarios da Asociación Down Pontevedra "Xuntos" (Pontevedra) e restauración de mobles e tapizaría para 23 persoas da Asociación de Veciños de Chapela (Redondela). O xoves 19 de setembro comezará un curso de conservación de memoria no que participarán 15 persoas da Asociación Cultural Moreira A Tope, de Soutomaior.

O venres 20 de setembro terán lugar tres inicios de cursos de Provincia Activa: restauración de mobles e tapizaría con 18 usuarios da Asociación de Xubilados e Pensionistas Caldenses (Caldas de Reis), plantas medicinais con 16 usuarios da Asociación de Veciños Santa Apolonia de Guimarei (A Estrada) e musicoterapia con 15 usuarios da Asociación Cultural de Santo Estevo de Ponteareas. Por último, o sábado 21 de setembro comezarán outras dúas accións: restauración de mobles e tapizaría con 16 usuarias da Asociación de Mulleres de Seixido (A Lama) e risoterapia coa participación de 15 persoas da Asociación de Veciños San Gregorio de Corredoira (Cerdedo-Cotobade).

En total, a Deputación ofertou catorce tipos de obradoiros no catálogo de Provincia Activa, divididos en seis bloques: Benestar natural (Plantas medicinais), Saúde en movemento (Pilates, ioga e ximnasia de mantemento para persoas maiores), Emociónate (Conservando a memoria, Musicoterapia, Risoterapia e Terapia emocional: Positividade e canalización das emocións), Outra vida (Teatro e Restauración de mobles e tapicería), Con ritmo! (Bailes de salón e Pandeireta e canto popular) e Redeir@s (Habilidades dixitais para uso cotián e Informática. Nivel Avanzado). Provincia Activa conta este ano cun orzamento de 146.000 euros e están a participar nos obradoiros entidades de 42 concellos da provincia.