O Museo de Pontevedra acaba de recibir en doazón dous cadros do pintor Manuel Abelenda Zapata. Trátase de dous óleos nos que retrata ao seu amigo o escultor Bonome, que é o autor dos marcos de ambos os cadros. O vicepresidente da Deputación de Pontevedra, Rafa Domínguez, xunto coa ata agora propietaria das pinturas, Teresa Vilas Vázquez, asinaron a acta de doazón.

Os cadros doados retratan ao escultor compostelán Santiago Rodríguez Bonome (1901-1995), representado na colección do museo con cinco esculturas, pero do que non se conservaba ningunha representación iconográfica. Ambas as dúas obras teñen marcos tallados polo propio escultor, o que lle engade un valor adicional á doazón.

O autor dos retratos é Manuel Abelenda Zapata (1889-1957), grande amigo do retratado. Son dous magníficos exemplos da etapa tenebrista-simbolista que cultiva na década de 1920; unha etapa e un xénero que ata agora non estaba representado no conxunto de obras do pintor que forman parte da colección do museo, agás por un debuxo. Un dos retratos é, posiblemente, o que Abelenda expuxo con grande éxito na Exposición Regional de Pintura de Santiago, en 1923.

O estado de conservación das pinturas é aceptable, aínda que require dunha intervención de reparación e limpeza. O traballo será abordado nas próximas semanas polo equipo de restauración do museo. Logo de que se restauren, unha das pinturas pasará a formar parte da exposición permanente que se mostra nas salas do Edificio Castelao.

Galerias de imaxes