A Deputación de Pontevedra acaba de aprobar unha axuda ao Concello de Portas, por valor de preto de 35.000 euros, coa que poderá facer fronte á reparación da pista do pavillón polideportivo da Rapeira. Estes recursos pertencen ao Plan Extraordinario de Infraestruturas Deportivas da Deputación, dotado de 4 millóns de euros para todos os concellos da provincia (59) cun número de habitantes inferior a 50.000.

O Concello de Portas recibirá un total de 34.397,84 € para reparar a pista do pavillón polideportivo, que ten a tarima deteriorada na zona de portaría e no seu perímetro. En concreto, cos recursos provinciais substituirase o pavimento en mal estado e pulirase e vernizarase a zona reparada, co trazado final das liñas de xogo dos catro campos con pintura de poliuretano. Ademais, no perímetro da pista polideportiva colocarase un taboleiro contrachapado de pino fenólico.

O Plan Extraordinario de Infraestruturas Deportivas da Deputación mobilizou ata o momento preto de 2,9 dos 4 millóns de euros do orzamento total, con achegas para Agolada, Arbo, As Neves, Baiona, Barro, Campo Lameiro, Cangas, A Cañiza, Catoira, Cerdedo-Cotobade, Covelo, Crecente, Cuntis, Dozón, A Estrada, Fornelos de Montes, Gondomar, O Grove, A Illa de Arousa, Lalín, A Lama, Marín, Meaño, Meis, Mondariz, Mondariz-Balneario, Moraña, Nigrán, Oia, Pazos de Borbén, Poio, Ponte Caldelas, Pontecesures, Portas, Redondela, O Rosal, Rodeiro, Ribadumia, Salceda de Caselas, Salvaterra de Miño, Sanxenxo, Silleda, Soutomaior, Tui, Valga, Vila de Cruces, Vilaboa, Vilagarcía de Arousa e Vilanova de Arousa.