A artista Ch Sueiro impartirá este xoves, 1 de xuño, de 18 a 20 horas, un obradoiro creativo dirixido a persoas maiores de 16 anos no marco da mostra “Alma madeira mar” que está a acoller a Sala Maruja Mallo da sede da Deputación en Vigo. Baixo o título “Mar d forma”, Sueiro introducirá as persoas participantes no proceso creativo a partir de materiais devoltos polo mar, animándoas a que xoguen con estes obxectos para darlles forma. Para asistir é necesario inscribirse no enderezo electrónico participa.cultura@depo.es e cómpre que as persoas acudan con material recollido previamente na praia ou nas rochas para, a partir de aí, comezar a explorar.

“Mar d forma” está ligado á mostra “Alma madeira mar”, onde Ch Sueiro amosa ata o 16 de xuño na sede da Deputación en Vigo pezas de escultura elaboradas coas madeiras que o mar lles devolve ás praias e aos cantís. As súas obras teñen carácter surrealista e son de pequeno e medio formato, e a madeira convértese nun pretexto para crear pezas que xorden do imaxinario e do onírico, con sereas, barcos, náufragos ou medusas. Tamén xorden peregrinas e peregrinos para ser contemplados nas súas tres dimensións. En definitiva, e en palabras da artista, é “o mundo do mar interpretado dun xeito máxico, pero tamén achegado á terra”.

Ch Sueiro estudou Belas Artes en Madrid e aborda na súa traxectoria a pintura surrealista e a escultura con madeira e ferro como materias primas. Ten exposto en galerías e museos de España, e fixo mostras colectivas en Milán e París. En 1986 fundou a Galería Conde Sueiro, onde amais de amosar o seu traballo de forma permanente, ofrece a obra de artistas da Península e Europa.