O 23 e 24 de setembro terán lugar as dúas actuación coas que o Museo de Pontevedra pechará a edición deste ano de EmprazArte, unha iniciativa cultural que naceu o verán pasado cunha oferta para todos os públicos para encher de vida a praza que dá acceso ao Edificio Castelao. As actuacións previstas cambian de data con respecto á previsión inicial, pero mantense a fórmula coa que se busca chegar a toda a cidadanía: música o venres á noite e actuación infantil o sábado pola mañá totalmente de balde.

O protagonista da actuación do venres 23 de setembro ás 21.00 horas será Rodrigo Ramos. Este músico e compositor de Silleda iniciou a súa carreira en solitario en 2015, logo de máis dunha década formando parte de distintos grupos. Dous anos mais tarde publicou o seu primeiro álbum, 'Mirabas almas', no que amosaba a súa versatilidade en directo, e que acompañou cunha xira de máis de cincuenta concertos por toda a península, tanto con banda como en formato acústico.

En 2019 chegou 'Sol de invierno', un álbum cálido no que destaca o aspecto vocal. Os arranxos de piano sosteñen un traballo caracterizado por melodías pegadizas reforzadas por órganos Hammond e guitarras eléctricas. Nos dez temas deste disco, Rodrigo Ramos explora as zonas de sombra emocionais da existencia humana.

Ao día seguinte ás 12.30 horas terá lugar a actuación de Magín Blanco, un dos máis coñecidos creadores de propostas escénicas para público familiar no panorama actual galego. É o creador de pezas como 'A nena e o grilo', 'A nena e o grilo nun barquiño', 'Canta o Cuco' -con Uxia Senlle-, ou 'A nena e o grilo máis aló' , entre outros, e participou en moitos outros proxectos, como 'María Fumaça' e 'Rosalía Pequeniña'. En 2019 Carlos Rego dedicoulle unha biografía con disco recopilatorio: 'Magín Blanco - O Camiño da Luz'.

En EmprazArte presentará o espectáculo 'Caderno de cores e cancións'. Trátase dun percorrido pola creación musical e literaria das cancións, que parte do legado dos trobadores vencellado ás cores e as súas sinerxías, tanto emocionais como naturais. Acompañado no escenario de Pablo Vidal, Magín Blanco xogará con elementos sinxelos como as melodías, as harmonías e a musicalidade poética das rimas para construír e descubrir un universo persoal ou colectivo.

Galerias de imagenes