O presidente da Deputación de Pontevedra, Luis López, desvelou hoxe en conferencia de prensa as entidades gañadoras dos primeiros premios de Boas Prácticas en Igualdade, que recoñecerán o labor de entidades de Vigo, Cangas, Moaña, Poio, A Cañiza, Bueu e A Lama. “Trátase dunha iniciativa que responde ao noso firme compromiso coa igualdade e coa que queremos distinguir a persoas e entidades que realizan ou realizaron actividades e prácticas eficaces relevantes para conseguir a igualdade real” asegurou Luis López quen adiantou tamén que os premios se entregarán nun acto que terá lugar o xoves 21 de novembro, ás 19:00 horas, no Pazo provincial de Pontevedra.

En total recibíronse preto de 60 candidaturas para as catro modalidades de premios, o que demostra “que temos unha provincia moi comprometida coa igualdade, que está a desenvolver iniciativas moi interesantes para conseguir unha Pontevedra mellor”, asegurou o presidente provincial. Cada unha destas catro modalidades está dotada con 4.000 euros, 3.000 para os premios e 1.000 para os accésits.

Deste xeito, na modalidade de boas prácticas en materia de igualdade en entidades de iniciativa social, o primeiro premio recae na Asociación Rede de mulleres veciñais contra os malos tratos de Vigo e a Asociación de diagnosticados de Cancro de Mama recibirá un accésit; na modalidade de iniciativa cultural en materia de igualdade, o premio vai para a Asociación Cultural entre Bambalinas de Moaña; na modalidade de iniciativa deportiva en materia de igualdade, o primeiro premio é para o Club Poio Fútbol Sala e o Club Balonmán Cañiza recibe un accésit, e na modalidade de iniciativa educativa en materia de igualdade o primeiro premio é para o IES Illa de Ons e o Centro Público de Educación e Promoción de Adultos Nelson Mandela recibe un accésit.

Ademais destes galardóns, o 21 de novembro tamén se fará entrega das distincións honoríficas a aquelas entidades e persoas que destacan pola súa notoriedade e mérito no ámbito da igualdade. Neste caso, o presidente informou que recibirán os distintivos o Centro de Información á Muller do Concello da Guarda, polo seu programa de intervención psicosocial con mulleres vítimas da violencia de xénero ou situacións familiares conflitivas. E, a título póstumo, Carmen Lago Fernández, cofundadora da entidade de iniciativa social Faraxa pola abolición da prostitución, pola súa loita contra a prostitución e a trata de mulleres na provincia de Pontevedra.