O presidente da Deputación de Pontevedra, Luis López, vén de participar este venres no Palacio de Congresos de Palma de Mallorca na sesión de debate, redacción e aprobación dunha declaración conxunta dos presidentes de Deputacións, Cabildos e Consellos Insulares. Un manifesto co que a Deputación de Pontevedra se une ao municipalismo español, que pide unha reforma do sistema de financiación local, que sexa suficiente e elaborada en consenso, para que se poida garantir a igualdade na prestación dos servizos para toda a poboación.

Neste punto, os dirixentes provinciais amosan a súa unidade á hora de esixir ser escoitados na apertura dun necesario proceso de reforma do sistema de financiamento, que debe incluír tamén a financiación autonómica, que deberá asegurar a suficiencia financeira de todos os gobernos locais. Relacionado con este punto está tamén a preocupación polo actual reparto de competencias, do que reclaman tamén unha revisión en profundidade, en particular para gobernos intermedios como os das Deputacións, para evitar solapamentos entre os diferentes niveis da Administración e dotalos de recursos suficientes para desenvolver as súas competencias e servizos públicos.

Un acordo dos representantes dos gobernos provinciais do país que poñen o foco tamén nunha aposta decidida por un turismo sustentable, a transformación dixital e o respecto polo medio ambiente nas actividades económicas do sector primario. Do mesmo xeito, amosan a súa vontade de cooperación entre administracións territoriais para compartir coñecementos e experiencias que permitan un mellor aproveitamento dos recursos de cada territorio mediante o uso común de medios técnicos, especialmente no ámbito dos servizos dixitais.

Coa aprobación desta declaración conxunta deuse por clausurada a sexta edición da Conferencia de Presidencias Provinciais organizada pola Fundación Democracia e Goberno Local, en colaboración coa FEMP; na que o presidente López representou á veciñanza da provincia de Pontevedra.

Esta derradeira xornada da Conferencia celebrada na cidade de Palma de Mallorca contou tamén con dúas mesas de debate. Unha, centrada nos retos do turismo responsable; e outra, sobre a transformación dixital, a intelixencia artificial e a ciberseguridade. Así mesmo, os dirixentes provinciais tomaron parte dunha visita oficial á Catedral de Palma, que serviu para poñer o broche de ouro a un evento no que se trataron asuntos estratéxicos para a Administración local.

Galerias de imaxes