Ás portas da celebración da nova edición do congreso ‘As Mulleres que Opinan son Perigosas’, os vindeiros venres e sábado 17 e 18 de marzo no Teatro Principal de Pontevedra, a Deputación e o Concello de Pontevedra veñen de publicar as bases da primeira edición dos Premios #MulleresQueOpinan. Serán premiados con 1.000 euros os mellores artigos de opinión escritos en galego e en castelán sobre as temáticas que se aborden no encontro, e ademais serán publicados nos principais xornais da provincia de Pontevedra.

Con esta iniciativa, a Deputación e o Concello de Pontevedra promoven o exercicio da opinión xornalística por parte das mulleres profesionais do xornalismo, á vez que anima e promove a escrita entre as mulleres máis novas e fomenta o nacemento dunha nova canteira de mulleres opinadoras. As bases xa están dispoñibles no Boletín Oficial da Provincia de Pontevedra e o prazo para presentar as solicitudes abrirá o 20 de marzo e pechará o 10 de abril.

Poderanse presentar aos Premios #MulleresQueOpinan artigos de opinión sobre a propia experiencia como espectadoras ou asistentes (de maneira virtual ou presencial) arredor de calquera dos temas que se traten no congreso 2023: poden ser os das conferencias ou tamén os que se traten nas roldas de preguntas. O único requisito, ademais da temática, será que o texto acredite ter asistido ao foro e inspirarse nel para escribir a peza de opinión. En canto á extensión, sen contar espazos, non poderán exceder dos 3000 caracteres, e constarán de titular e corpo. Os artigos orixinais poden ben ser inéditos ou ben teren sido publicados por xornalistas que cubrisen as xornadas do foro e os publicasen nos medios nos que traballan.

Trece mulleres da comunicación debaten este ano no Teatro Principal

Conquistar o espazo público e mediático é tarefa fundamental da perigosidade feminina. Por iso, o 17 e 18 de marzo de 2023, o congreso ‘As Mulleres que Opinan son Perigosas’ volve ao Teatro Principal de Pontevedra cinco anos despois como un foro xa consolidado como cita de referencia fóra e dentro de Galicia. Nesta sexta edición escoitaranse trece profesionais de diferentes perfís para reivindicar que as mulleres están aquí e que non hai marcha atrás: Alba Moledo Ucha, xornalista en Diario de Pontevedra; Sindy Takanashi, creadora de contido; Aida Pena, xornalista na Cadena SER; Nuria Labari, xornalista e escritora e opinión en El País; María Guerra, xornalista e crítica de cine; Mara Torres, xornalista na Cadena SER; Antía Paz, xornalista e opinión en Luzes; Paloma Rando, columnista, guionista de televisión e opinión en El País; Marta Peirano, xornalista e opinión en El País, Muy Interesante e Radio Nacional; Paula Montes, xornalista en Radio Vigo; Laura Ferrero, xornalista, escritora, guionista e opinión en El País e La ventana da Cadena SER; María Martín, de @generoenaccion; e Rosa María Calaf, xornalista e correspondente internacional.