Os concellos de Agolada, Dozón, A Estrada, Forcarei, Lalín, Rodeiro,  Silleda e Vila de Cruces recibirán este ano máis de 7,6 millóns de euros a través do Plan +Provincia da Deputación, o que supón preto dun millón de euros máis que os recursos destinados pola institución provincial a estes concellos o pasado ano, no que recibiron 6,6 millóns de euros. O presidente Luis López remitiulles este mércores 3 de xaneiro unha carta ás alcaldesas e aos alcaldes, tanto destes coma dos restantes concellos de menos de 50.000 habitantes que se benefician do +Provincia, na que se detallan os recursos que lles corresponden e as principais novidades do plan, cuxa convocatoria se publicou tamén este mesmo mércores no Boletín Oficial da Provincia de Pontevedra (BOPPO) logo de ser aprobado no último pleno do 2023. A partir de agora, os concellos terán tres meses para presentar as solicitudes.

O plan, elaborado conforme aos principios de reforzo da capacidade inversora, maior autonomía local e atención aos retos comúns de futuro, pretende, tal e como remarcou o presidente na carta remitida aos concellos, “avanzar conxuntamente nun modelo de cooperación e lealdade institucional que permita desenvolver as múltiples potencialidades da provincia”. Con este obxectivo, neste 2024 o plan de obras e servizos da Deputación incrementou a súa dotación en 4,2 millóns de euros, ata alcanzar os 48,2 millóns de euros, que se distribuirán entre os 59 concellos de menos de 50.000 habitantes da provincia a través de catro liñas. A primeira delas, dotada con 33,74 millóns de euros, vai destinada a investimentos; a segunda, con 4 millóns, céntrase no gasto corrente dos concellos; a terceira, de 9,25 millóns, para a activación do emprego; e a cuarta e novidosa liña, dotada con 1,2 millóns, para proxectos transformadores relacionados coa mobilidade.

No caso das comarcas de Deza e Tabeirós-Terra de Montes, os 7.622.660 euros que recibirán os seus concellos permitirán destinar ata 5,4 millóns de euros a novos investimentos; 632.681, a gasto corrente; 1,5 millóns, a fomentar o emprego, e 190.567, a proxectos transformadores relacionados coa mobilidade. Para facilitar a xestión dos recursos, o Plan +Provincia permite flexibilizar o traspaso de crédito entre liñas, de tal forma que poderá traspasarse o 100 % das liñas 2,3 e 4 á liña 1; ata o 60 % da liña 3 á liña 2; e entre o 30 % e, con carácter extraordinario, ata o 50 % da liña 1 á liña 2 de acordo cos requisitos establecidos nas bases publicadas o pasado mércores no BOPPO. Ademais, tamén se incorpora por vez primeira o criterio de reto demográfico para ponderar o impacto do envellecemento e a perda de poboación nos últimos dez anos.

En concreto, Agolada recibirá 639.503 euros, 96.552 máis que o pasado ano; Dozón 477.268 euros, 91.406 máis que en 2023; A Estrada 1.770.099 euros, 210.357 máis que no ano que acaba de rematar; Forcarei 679.831 euros, 92.839 euros máis; Lalín 1.764.085 euros, 235.706 euros máis con respecto ao ano pasado; Rodeiro 638.090 euros, 91.686 máis que en 2023; Silleda 889.348 euros, 45.780 euros máis; e Vila de Cruces 764.438 euros, 71.152 máis que ano que acaba de rematar