A Deputación de Pontevedra acaba de publicar no Boletín Oficial da Provincia (BOPPO) as bases da nova edición do programa +Convivencia, que ten por obxectivo que entidades sen fins de lucro compartan experiencias, creen espazos de participación e poñan en valor o patrimonio da provincia.  Despois do grande éxito que tivo o programa no 2024, cando a xestión das saídas pasou a estar en mans de cada asociación, e máis de 13.000 persoas de 200 entidades gozaron de excursións pola provincia, este ano a institución provincial aumenta nun 25% o orzamento, pasando dos 220.000 aos 275.000 euros.

No marco de +Convivencia, a Deputación oferta un amplo catálogo de actividades e rutas que inclúe propostas de todo tipo: relacionadas coa arqueoloxía, coa arquitectura civil, a relixiosa, a popular, cos faros, co Camiño de Santiago ou cos museos. As actividades están abertas a entidades de iniciativa social, asociacións de mulleres, de maiores, veciñais e culturais ou tamén ANPAS da provincia. En total, ofértanse un máximo de 229 propostas e cada entidade recibirá ata 1.200 euros para poder organizalas, fronte aos 1.000 euros do pasado ano. Ademais, o número mínimo de persoas participantes en cada excursión redúcese a 30 ou 20 no caso daquelas viaxes ou actividades nas que sexa necesario contratar autobuses e participen persoas con mobilidade reducida que precisen unha cadeira de rodas ou outras axudas técnicas.

As entidades interesadas en participar en +Convivencia poderán solicitar saídas a partir do vindeiro 1 de marzo e ata o 1 de decembro ou ata que se esgote o crédito dispoñible, sendo a data límite para poder realizalas o 31 de decembro de 2025.