O presidente da Deputación de Pontevedra, Luis López, pon de manifesto  o impulso á mellora da seguridade viaria na rede de estradas provinciais que está a levar a cabo o organismo provincial nunha visita ao Concello de Fornelos de Montes para comprobar o remate da obra de construción dunha senda peonil na EP-2801 entre as localidades de Fornelos e Estacas que supuxo un investimento de 213.500 euros a través dun convenio de colaboración entre a Deputación e o Concello. Acompañado polo alcalde de Fornelos, Emiliano Lage, e a deputada de Infraestruturas, Belén Cachafeiro; o presidente Luis López percorreu un treito desta nova senda peonil de 210 metros de longo que mellorará a seguridade viaria e a imaxe da estrada. “Non hai semana na que non visitemos concellos para anunciar obras encamiñadas a mellorar a seguridade viaria, aquí en Fornelos temos un exemplo claro”, afirmou o presidente despois de comprobar o remate do proxecto.

A obra supuxo a intervención nun treito de 210 metros, entre os puntos quilométricos PQ 0+000 e PQ 0+210, consistiu nun incremento do ancho das beirarrúas existentes ao longo desta estrada de distintos xeitos. No primeiro treito creouse unha zona de convivencia de preferencia peonil pola presenza de construcións á beira da estrada e no resto do viario implantouse unha senda peonil de 2,50 metros de ancho, así como a instalación dunha nova rede de pluviais e soterramento das liñas eléctricas. A obra está valorada en 213.500€, dos que a Deputación achegou o 80 %, uns 184.000 euros; e o Concello o 20 % restante –dentro destes, 12.600 € corresponden ao Plan Concellos 2023— así como o custo das expropiacións necesarias para ampliar a estrada. “Somos a casa de todos os concellos, onde se poden apoiar para executar proxectos estratéxicos”. Subliñou López.

O encontro entre o presidente provincial e o rexedor de Fornelos de Montes serviu tamén para repasar os investimentos previstos polo goberno provincial para este ano no Concello a través dos distintos plans de cooperación que están en marcha. Deste xeito, a Deputación porá a disposición do goberno local ata un máximo de un millón de euros, dos que 771.900€ corresponden á achega do +Provincia, 85.365€, ao Plan Extraordinario de Infraestruturas Deportivas; e ata medio millón de euros, polo Plan Extra. Neste sentido, salientou Luis López que a sensibilidade do goberno provincial con aqueles concellos que sufren os efectos do reto demográfico como Fornelos de Montes vense beneficiados cunha maior aportación de recursos para facer fronte a este desafío. “Seguimos avanzando para facer unha provincia mellor e o mantemento da rede viaria é fundamental porque implica mellorar a calidade de vida”, concluíu o presidente da Deputación.

Galerias de imaxes

audios