A Xunta de Goberno da Deputación acaba de darlle luz verde á contratación, cun orzamento base de licitación de 130.000 euros, da subministración de illas ecolóxicas de contedores ao abeiro do proxecto “Da túa man (rural)”, o programa de apoio á actividade comercial do rural que se desenvolve en once concellos da provincia: Agolada, Arbo, Barro, Campo Lameiro, Cuntis, Forcarei, Meis, Mondariz, As Neves, Rodeiro e Pontecesures. “Este é un proxecto que busca visibilizar e modernizar o pequeno comercio local no ámbito rural, así como crear vínculos en toda a cadea de valor do comercio local e do produto de km 0”, explicou o presidente provincial, Luis López, en rolda de prensa.

En concreto, as illas ecolóxicas contarán con contedores específicos para papel e cartón, envases lixeiros, vidro, biorresiduos e restos; e as empresas interesadas poderán presentar propostas ata 15 días despois da publicación do anuncio de licitación. As instalacións deberán estar dotadas, ademais, dun panel con información para facilitar a identificación das diferentes fraccións de residuos, esta última estará apoiada con guías ou folletos que se distribuirán entre os comercios e outros que servirán para facilitar a elección do xestor e o seu tratamento.

Ademais desta iniciativa que acaba de lanzar a Deputación, “Da túa man (rural I)” abrangue outros proxectos que xa están en marcha, coma a instalación de dispositivos para reciclar residuos especiais, a posta en marcha dunha rede de comercio retallista, produtores locais e provedores, a instalación de sinalética integrada, a promoción de bolsas e mochilas sostibles, o desenvolvemento de campañas de comunicación e a divulgación en soportes dixitais e diferentes accións formativas.