“Da túa man” (rural I e II): visibilizar e modernizar o pequeno comercio local para adaptalo aos novos hábitos de consumo a través da implantación e uso das novas tecnoloxías e do desenvolvemento de prácticas que promovan a economía circular (reducir a xeración de residuos e promover a súa reutilización e reciclaxe), así como dunha mellora no acondicionamento dos espazos que sirva para ofrecerlle un servizo óptimo á poboación local e que atraia visitantes.

Así mesmo, preténdese crear vínculos en toda a cadea de valor do comercio local e do produto de quilómetro cero para impulsar unha estratexia común que implique as comunidades locais e, da man dos concellos e da Deputación de Pontevedra, aproveitar as potencialidades e os recursos endóxenos (produtos locais, culturais e turísticos) destes termos municipais para favorecer a empregabilidade e a permanencia da veciñanza no territorio.

As actuacións levaranse a cabo en vinte e dous municipios da provincia de Pontevedra cunha poboación inferior aos 5.000 habitantes:

“Da túa man” (rural I): Agolada, Arbo, Barro, Campo Lameiro, Cuntis, Forcarei, Meis, Mondariz, As Neves, Pontecesures e Rodeiro.

“Da túa man” (rural II): A Guarda, A Illa de Arousa, Catoira, Covelo, Crecente, Fornelos de Montes, Moraña, Oia, Pazos de Borbén, Portas e Vilaboa.

• TRANSFORMACIÓN DIXITAL. Deseñar e lanzar campañas de comunicación en soportes dixitais para visibilizar o comercio e os produtos locais, e promocionar a imaxe do comercio de proximidade, os produtos de calidade, a sostibilidade e a economía circular, así como experiencias turísticas vinculadas ao comercio local.
• TRANSFORMACIÓN DO PUNTO DE VENDA. Adaptar a accesibilidade á contorna comercial para garantir que os municipios teñan prazas de aparcamento reservadas para persoas con discapacidade e delimitar a zona comercial mediante o embelecemento con xardineiras.
  Instalar sinalética integrada corporativa próxima á área comercial, con información sobre a localización da zona comercial e dos comercios existentes.
• SOSTIBILIDADE E ECONOMÍA CIRCULAR. Crear e promover novos deseños de embalaxe sostible e reutilizable como alternativa ao plástico e ao papel para o comercio de proximidade.
  Instalar illas ecolóxicas coa subministración de contedores necesarios para separar as diferentes fraccións de residuos, dotados dun panel con información para facilitar a identificación das diferentes fraccións de residuos e embelecer a zona con plantas ou peches vexetais.
  Colocar dispositivos para reciclar residuos especiais cun sistema integrado para a recollida selectiva de pequenos residuos específicos e altamente contaminantes, coma pilas, lámpadas, baterías ou residuos electrónicos.
• SUBMINISTRACIÓN E RASTREXABILIDADE. Crear unha rede de comercio local para integrar os axentes que o compoñen coas e cos produtores locais e provedores afíns co fin de establecer vínculos comerciais e estreitar e fortalecer as relacións de subministración, así como a súa configuración como unha comunidade de aprendizaxe, e tamén de compartir información e a visibilización dos produtos locais a través de videoexperiencias.
• SENSIBILIZACIÓN E FORMACIÓN. Realizaranse obradoiros dirixidos ás e aos comerciantes para axudar a potenciar os negocios de proximidade mediante a formación teórico-práctica en habilidades con ferramentas dixitais e en estratexias comerciais en internet para darse a coñecer, incrementar as vendas e fidelizar o público a través da venda en liña.
  Tamén se organizarán obradoiros dirixidos ás e aos comerciantes e ás persoas consumidoras para contribuír á sostibilidade da actividade mediante accións que favorezan a economía circular.

“Da túa man” (rural I): trinta meses (desde o 1 de xaneiro de 2022 ata o 30 de xuño de 2024) prorrogado ata o 31 de decembro de 2024; o Ministerio notificoulle á Deputación de Pontevedra a resolución de concesión da axuda o 27 de febreiro de 2023.

“Da túa man” (rural II): dezaoito meses (desde o 1 de xaneiro de 2023 ata o 30 de xuño de 2024) prorrogado ata o 31 de decembro de 2024; o Ministerio comunicoulle á Deputación de Pontevedra a resolución de concesión da axuda o 3 de novembro de 2023.

(*) A Deputación de Pontevedra fai unha achega a maiores, con fondos propios, de 159.940,00 € para a xestión do proxecto.

Move é unha iniciativa da Deputación de Pontevedra e dos concellos adheridos para crear unha rede de comercio local na provincia, onde as persoas comerciantes e hostaleiros estreiten vínculos con produtores e provedores locais.

Trátase dunha xanela para darse a coñecer, para compartir e para establecer relacións comerciais e novas oportunidades de negocio. Terás a posibilidade de contar a historia do teu negocio impulsando o consumo de produtos de calidade, de proximidade e de quilómetro 0.

• Bases (BOPPO 09/04/2024)
• Tramitación en sede.depo.gal
• Folleto (pdf)
• Aprobación do listado  para a rede do comercio local MOVE (15/07/2024)
• Ampliación dos códigos IAE das bases polas que se regula o procedemento e condicións para a adhesión (BOPPO 06/11/2024)
• Bases para a ahdesión á rede de comercio Local MOVE (11/11/2024)
• Aprobación adhesión Rede MOVE segundo listado (03/12/2024)