A Deputación de Pontevedra vén de aprobar o expediente para sacar a licitación as obras de reordenación da EP-4006 no seu treito inicial en Ponteareas, na Avenida Sarmiento Rivera. Estes traballos, que buscan garantir a mobilidade das persoas a través da creación dun itinerario peonil accesible neste tramo situado no núcleo urbano, teñen un orzamento de 630.423 euros que serán financiados ao 100% pola institución provincial. A intención é que, unha vez finalizadas as obras, se transfira este tramo ao Concello de Ponteareas.

A actuación abrangue o tramo comprendido entre a glorieta situada xunto ao Concello de Ponteareas (onde conflúe a avenida Sarmiento coa rúa Concha Brey e as avenidas de Galicia e Rosalía de Castro) e a glorieta coas rúas Redondela e Pombas. Con ela preténdese mellorar as condicións de seguridade e mobilidade para as persoas nesta céntrica avenida, mediante a construción de beirarrúas adecuadas para configurar itinerarios peonís continuos, accesibles e seguros, ao tempo que se resta prioridade ao espazo destinado ao tráfico rodado e se implantan medidas que permitan conseguir o calmado efectivo do mesmo.

O estreitamento da calzada xunto cos pasos peonís elevados buscan conseguir unha redución efectiva da velocidade e conformar unha “porta de entrada” ao núcleo urbano, recuperando o espazo público para a cidadanía. Así, na zona máis próxima ao Concello, onde a existencia de edificacións en ámbalas dúas marxes non permiten ampliar a sección actual, encaixaranse beirarrúas de 2,5 m e unha calzada de 5,70 metros entre bordos. No resto, redúcese a calzada actual a 6 metros, mantendo a política de carrís estreitos que favorezan a redución de velocidade e conseguindo ademais que as beirarrúas queden por riba dos 2,5 m.

Ademais, acondicionarase e melloraranse as características da estrada en canto a seguridade e comodidade das persoas usuarias, como a adecuación da iluminación, a dotación de sinalización horizontal e vertical e a reposición daqueles servicios afectados pola execución das obras.