Un total de 350 mulleres de asociacións de catorce concellos da provincia comezan a próxima semana vinte novas accións formativas enmarcadas no programa “Conectadas” da Deputación de Pontevedra. Esta iniciativa ten como principal obxectivo potenciar a promoción das mulleres a través de accións formativas que este ano se desenvolverán en 53 concellos e contarán coa participación de máis de 4.000 usuarias.

O luns 25 darán comezo catro accións. Doce mulleres da Asociación de Veciños San Mamede de Torroso, en Mos, iniciarán un curso de poda e tarefas do campo desde a sostibilidade; dezaoito mulleres da Asociación Cultural Deportiva Saliceta de Salceda de Caselas, un de ximnasia hipopresiva; vinte integrantes da Asociacón de Mulleres Rurais Mar e Agro de Bueu, outro de teatro; e vinte e cinco  mulleres da Asociación de Féminas en Acción de Vilanova de Arousa outro de pilates.

O martes 19 será a quenda de dez novos obradoiros. Neste caso, vinte e tres mulleres da Asociación Española Contra o Cancro de Bueu comezarán o curso Coidar Coidándonos; dezaseis persoas da Asociación de Veciños de Corrigatos de Moraña e outras dezaseis da Asociación de Veciños de Santa Cristina de Cobres participarán no de alfabetización dixital; vinte e cinco integrantes da Asociación de Veciños Nosa Terra de Pereiras de Mos iniciarán unha actividade de ximnasia hipopresiva; vinte e dúas mulleres da Asociación Española Contra o Cancro de Mos comezarán o curso de risoterapia; vinte persoas da Asociación Cultural Candelas de Portas o de taichí; dezaseis mulleres da Asociación de Mulleres Rurais de Matalobos na Estrada e outras doce da Casa Santa María de la Esperanza Esclavas de la Virgen Dolorosa o de pilates; e catorce persoas da Asociación de veciños Barrio de Saramagoso de Redondela iniciarán unha acción formativa sobre pintura. 

O mércores 20, catorce mulleres da Asociación de Mulleres Rurais Castro Valente da Estrada comezarán un curso de ioga e outras doce da Sociedade Cultural do Viso en Redondela unha acción formativa de artesanía en coiro. Pola súa banda o xoves comezarán o seu curso de pintura quince mulleres da Asociación Santa Isabel de Silleda.

Finalmente, o sábado 30 de setembro comezarán as súas accións formativas tres asociacións da provincia. Quince mulleres da Asociación O Abeiro de Marín e outras vinte e catro da Asociación de Veciños Cultural e Deportiva de Lourido, en Poio, iniciaranse no sendeirismo. Ademais, outras catorce mulleres da Asociación Amas de Casa Témporas de Agolada comezarán un curso para aprender a realizar artesanía en coiro.

Este ano participan en “Conectadas” 219 entidades de 53 concellos da provincia. Os colectivos puideron escoller entre trinta obradoiros ofertados dentro de cinco bloques temáticos: Emprende, iniciativas sostibles para o emprego; ExpresARTE; Conéctate; O teu momento. Coidado e benestar; e Sementa sostibilidade. Todas as accións formativas inclúen, de forma transversal nos seus contidos, o tratamento da igualdade entre homes e mulleres e teñen unha duración de 35 horas.