A Deputación recupera a atención presencial directa en tódolos seus servizos suprimindo a obriga de concertar cita previa, agás no ORAL onde continuará para manter o nivel de calidade alcanzado na atención especializada ás persoas contribuíntes. A Administración provincial, unha vez decaídas a meirande parte das restricións sanitarias decretadas polas autoridades autonómicas por mor da pandemia, contribúe tamén deste xeito á recuperación da plena normalidade na relación coa cidadanía.

Máis de 160.000 persoas foron atendidas, principalmente polo servizo do ORAL, dende que o pasado 1 de xuño de 2020, durante a última prórroga do estado de alarma, implantouse o sistema de cita previa, xunto co traballo en remoto para o persoal, no que supuxo todo un reto de organización para a Deputación. O deputado de Réxime Interior e Facenda, Carlos Font, considera que estamos diante de "cifras impresionantes que confirman que se alcanzou o difícil reto de seguir atendendo á xente durante o peor das sucesivas ondas da covid19".

As máis de 160.000 citas xestionadas tradúcense nunha media de máis de 7.000 citas mensuais e de máis de 330 persoas cada día , que non deixaron de facer as súas xestións diante dos diferentes servizos da Deputación gracias á implantación deste e outros mecanismos tecnolóxicos que permitiron superar a barreira das restricións á presencialidade.

As claves do éxito, estima Carlos Font, foron a calidade na atención telefónica para xestionar as citas, a simplificación do portal web da Deputación cun apartado novo para reservar, así como a creación da Oficina Virtual Tributaria (OVT) do ORAL, na que a asignación de hora e data para realizar trámites tributarios resulta moi sinxela. Precisamente, os resultados alcanzados nun servizo tan especializado como o ORAL motivan que a cita previa mantéñase, a partir de agora, como medida organizativa para outorgar preferencia, evitar as esperas e, ademais, garantir a máxima eficacia na atención personalizada nas diferentes xestións acerca das taxas e impostos municipais.

O maior número de citas previas durante os case dous anos transcorridos entre o 1 de xuño de 2020 e día de hoxe produciuse na cidade de Pontevedra, dado que entre a sede da Deputación e os servizos centrais do ORAL xestionáronse preto de 25.500 citas. A actividade tamén resultou especialmente intensa nas oficinas do ORAL en Ponteareas, O Porriño, A Estrada, Caldas de Reis, Tui e Lalín. En todas elas superáronse as 10.000 citas. Destaca tamén o volume de citas da sede administrativa en Vigo con preto de 6.500. En canto ao resto das oficinas do ORAL, Nigrán superou as 8.200 citas e a continuación situáronse as oficinas de Cangas, Sanxenxo, Cambados, Moaña e Vilanova de Arousa, todas elas con máis de 5.000. Xa con cifras menores de citas funcionaron as oficinas do Rosal, Tomiño, A Cañiza e Ponte Caldelas, aínda que por enriba aínda das 1.000. E, finalmente, as oficinas de Bueu, As Neves, Arbo, Covelo e Crecente, por esta orde.

Por outra banda, a Deputación fixo posible gracias á implantación da Administración Electrónica que os 53 concellos da provincia e as tres mancomunidades (Morrazo, Salnés e Val Miñor) adheridos ao sistema provincial de xestión dixital puidesen poñer en marcha os seus propios servizos de cita previa. A ferramenta provincial de Administración Electrónica, ademais da cita previa, fixo posible o funcionamento ordinario dos Gobernos locais cos plenos, comisións informativas, mesas de contratación e todo tipo de xuntanzas telemáticas con validez legal.

En canto ao traballo en remoto, estímanse en 6.000 as/os traballadoras/es que puideron continuar desempeñando as súas funcións durante a etapa posterior ao estado de alarma, entre elas/es unhas/uns 550 na propia Deputación Provincial, que si mantivo a presencialidade nos servicios esenciais e moi especialmente na Cidade Infantil Príncipe Felipe. Todo elo foi coordinado dende unha Comisión de Seguimento na que se foron adoptando todas e cada unha das máis de 200 medidas postas en marcha tanto para o funcionamento da propia Deputación como para manter a actividade e cooperación cos concellos.