Os traballos, que contan cun orzamento de 87.420 euros, teñen por obxecto a colocación de barreiras de seguridade, de tipo bionda, nos tramos curvos que coinciden con terreos en pendente. A empresa adxudicataria é Señalizaciones Villar S.A. e o prazo de execución quedou fixado en tres meses dende que se asine a acta de comprobación de replanteo sobre o terreo.

O departamento provincial de Infraestruturas, no marco da súa revisión ordinaria de tódalas estradas provinciais co obxectivo de detectar riscos para a seguridade viaria, decidiu a conveniencia de protexer con barreiras lonxitudinais as marxes desta estrada e minimizar así as consecuencias de posibles accidentes por saída de vía.

As obras, ademais da protección das curvas, inclúen a retirada das barreiras antigas que existen nalgúns puntos do trazado, así como a reciclaxe de tódolos materiais empregados. Os novos elementos de protección, adaptados á normativa actual, proporcionarán un adecuado nivel de contención aos vehículos, minimizando danos e lesións para as persoas ocupantes e o resto de usuarios da estrada, así como outras persoas ou obxectos situados nas proximidades. Para elo instalarase preto dun quilómetro de barreiras, así como 206 "captafaros" para mellorar a visibilidade en horario nocturno.