Proxecto expositivo
A “chambra”. O cuarto do lado
Joan Morera Arbones
Apertura e presentación do proxecto: xoves 14 de marzo, ás 19 h. Á charla de presentación do proxecto correrá a cargo do propio Joan Morera e da artista multidisciplinaría Carme Nogueira.
Do 14 de marzo ao 24 de maio
Sala Maruja Mallo. Sede da Deputación en Vigo
Horario de visita: de luns a venres, de 9 a 20 h
A “chambra”O cuarto do lado é unha instalación audiovisual específica composta de seis entrevistas inéditas gravadas entre Francia, Galicia e Euskadi, realizadas dentro do proxecto “Conchita et nous”, o cal se aproxima á historia das mulleres emigrantes españolas en Francia, fundamentalmente en París, durante os anos sesenta e setenta. “Chambra” é unha castelanización da palabra francesa chambre, que significa ‘cuarto’, habitualmente usada na xerga pola comunidade española en Francia. A curiosidade, ás veces inxenua, sobre as chamadas “Conchitas” (empregadas do fogar) ou bonne à tout faire, é o núcleo deste traballo que se levou a cabo grazas a residencias artísticas en París e Bilbao e no que se indaga sobre o papel das mulleres na emigración e a súa representación para cuestionar, sen darse conta, a propia construción da memoria e da historia.
Este amplo proxecto de investigación materialízase a través de diversos formatos, coma fotografía, serigrafía, escultura, ademais de gravacións audiovisuais. As testemuñas que aparecen en A “chambra”. O cuarto do lado dan conta do carácter poliédrico da representación e da nosa relación con ela a través do rol do propio “artista”, que actúa como unha sorte de documentalista etnográfico profundamente naíf.
Proxecto premiado na I Convocatoria #CultivaCultura
Coordinación: Vicepresidencia Primeira e Servizo de Cultura da Deputación de Pontevedra
Deseño: Servizo de Comunicación Institucional da Deputación de Pontevedra
Revisión lingüística: Servizo de Normalización Lingüística e Servizos Lingüísticos da Deputación de Pontevedra
PROXECTO DE
-
Joan Morera Arbones
Joan Morera Arbones
Vigo 1984
Artista, investigador e doutor en Belas Artes pola Universidade de Vigo coa tese Construción simbólica da paisaxe galega: transmisión xeracional da paisaxe. Realizou unha estancia de investigación en Bos Aires, no Museo da Emigración Galega na Arxentina (MEGA) e participou en residencias artísticas coma La Pinguela, en Oberá (Arxentina), organizada polo colectivo Trillo Sustenthable e a Facultade de Arte e Deseño da Universidade Nacional de Misións, así como en diferentes institucións públicas e privadas, coma o Colexio de España en París, a Fundación Bilbao Arte ou o Museo de Arte Contemporánea na Coruña.
Participou en multitude de certames artísticos, coloquios, encontros, exposicións colectivas e proxectos autoxestionados dentro e fóra do país. Así mesmo, traballou coa Galería Ad Hoc de Vigo e foi membro do colectivo LIBA.
Traballa sobre a memoria, as migracións e a construción da paisaxe contemporánea a través de diferentes formatos e soportes documentais, explorando a fotografía, a escultura, o debuxo ou o vídeo, entre outros. A súa obra consiste en proxectos de investigación artística formalizados en instalacións e no dispositivo documental. No seu caso, a práctica artística e a investigación entrelázanse e converxen nun continuo volver ver, e invitan a reflexionar sobre o contexto galego e o ibérico.
Novas relacionadas
A Deputación amplía ata o 24 de maio as visitas á exposición “A chambra. O cuarto do lado”, de Joan Morera, que acolle a Sede de Vigo
25/04/2024
A Sede de Vigo da Deputación acolle ata o 30 de abril unha mostra de Joan Morera que afonda nas mulleres emigrantes españolas en Francia
14/03/2024
A Sede de Vigo da Deputación abre este xoves 14 de marzo A “chambra”. O cuarto do lado, unha mostra do artista Joan Morera
12/03/2024