Urania Mella
Pianista, educadora e defensora da paz e dos dereitos das mulleres
Foi unha muller exemplar adiantada ao seu tempo, defensora dos dereitos das mulleres, cun gran compromiso político pero tamén social e educativo. Urania ensinoulles a escribir ás súas veciñas analfabetas na Casa do Pobo, como fixo seu pai, Ricardo Mella, teórico do anarquismo condenado ao desterro e a quen Durruti lía na fronte. Combateu contra as tropas de Franco en Vigo no alzamento nacional do 36 e acusárona de ser mala nai e de radicalizar o seu marido, Humberto, que foi executado; non obstante, os prexuízos de xénero das autoridades fascistas evitaron que Urania correse a mesma sorte.
Ler máis
podcast
FALADOIRO AQUÍ FALTAN PÁXINAS
Urania Mella. Pianista, educadora e defensora da paz e dos dereitos das mulleres
Iria Presa
Filóloga, investigadora, selectora e promotora cultural. A súa amizade con Xosé Reigosa, neto de Urania Mella Serrano (Pontevedra, 1899-Lugo, 1945), motiva o inicio dos seus estudos sobre a súa figura e a do seu pai, o anarquista e topógrafo vigués, Ricardo Mella Cea (Vigo, 1861-1925). Impulsada polo afán de recuperar a historia da familia Mella desde a fonte primaria, Iria inicia en 2012 un periplo investigador que a leva visitar arquivos, persoas e a obter información en Tui, A Coruña, Ferrol, Bilbao ou Barcelona; mais tamén en Montevideo, Bos Aires, A Habana, Nova York, San Francisco, Michigan, Cidade de México ou Cuernavaca. A súa defensa da relación entre Ricardo Mella e o ideal anarquista do poeta Manuel Antonio (Rianxo, 1900-1930) provoca que en 2017 atope en Bilbao a documentación da Escola de Náutica de Vigo e abra a web Epifanías libertarias para poñer en libre descarga o expediente do poeta xunto con outra documentación desta escola. Os textos de Iria, ao igual que a documentación de Mella, andan esparexidos polo mundo. Actualmente reside en México, onde continúa a súa investigación e a súa aventura artístico-vital.