Mary Quintero
A fotógrafa cun estudio propio e cunha ollada única
Neste capítulo a propia Mary Quintero —a primeira muller viva que forma parte da colección Aquí Faltan Páxinas— narra a súa fascinante historia, a dunha nena de Melide, nada na España dos anos trinta, que tivo a sorte de criarse nunha galería de cristal, que era como se lles chamaba na época aos estudios de fotografía. O seu pai fotografaba e a súa nai coloreaba. Ela, coma quen xoga, foino aprendendo todo. Fixo a súa primeira exposición en Lugo cando tiña 15 anos e, desde ese momento, o seu pai insistiu en que asinase co seu nome e animouna a ter o seu propio estudio, primeiro en Lugo e despois en Vigo, a onde chegou nos anos cincuenta para facer sesións fotográficas nas mellores casas da cidade, irrompendo nun mundo de homes no que destacaban fotógrafos do prestixio de Pacheco, Balín ou Ángel Llanos.
Ler máis
podcast
FALADOIRO AQUÍ FALTAN PÁXINAS
Mary Quintero “A fotógrafa cun estudio propio e cunha ollada única”
Mary Quintero
Nada en Melide en 1931, Mary Quintero mudouse a Lugo cando tiña uns nove anos e foi alí, no estudio familiar, onde se iniciou no mundo da fotografía. Sendo aínda adolescente, estudou en Madrid retoque fotográfico con Pedro Jaraba e pintura con Carlos Pascual de Lar. Con tan só 15 anos propuxéronlle a súa primeira exposición. A partir de aí, o boca a boca e unha ollada diferente para a fotografía converteron a Mary Quintero nunha das máis recoñecidas retratistas do momento en Galicia. A raíz dunha serie de traballos que lle solicitaron en Vigo, e tras comprobar o dinamismo que había na Cidade Olívica, decidiu montar o seu propio estudio na rúa Urzáiz seguindo o consello do seu pai, que desde ben nova a animou a diferenciarse da marca familiar e asinar co seu propio nome. Aquel foi o inicio dunha prolífica e extensísima carreira profesional, que tivo que compatibilizar co coidado dos seus catro fillos. Quintero destacou por innovar constantemente e foi pioneira en utilizar novas técnicas que lles ensinou a fotógrafas e fotógrafos de todo o mundo a petición de Kodak. Chegou a contar no seu estudio cun equipo de ata once persoas que aprenderon con ela o oficio. As súas fotografías están presentes en miles de fogares, sobre todo de Vigo, e foron moitos rostros coñecidos da política e da cultura os que se puxeron fronte á súa cámara. Participou en encontros profesionais en todo o mundo e logrou o recoñecemento das e dos seus colegas e das institucións. Hoxe experimenta coa pintura, a súa outra paixón, e asegura estar encantada coas posibilidades da fotografía dixital, aínda que a súa chegada lle obrigase a pechar o seu estudio.