Isabel Blanco

Licenciada en Dereito na Universidade de Granada, desde 1989 exerce en Vigo como avogada especializada en dereito matrimonial e de familia, e en violencia de xénero e menores, actividade que combina coa súa irresistible paixón pola escritura e pola creación. Foi docente na Escola de Práctica Xurídica do Colexio de Avogados de Vigo e tamén a avogada da Casa das Mulleres de Vigo e dos centros de información á muller de Mos e Ponteareas. Como creadora, foi idea súa realizar a mostra “Rompe, xoga en igualdade” (Deputación de Pontevedra, 2018). Creou a exposición de poesía visual “Amores que matan non son amores” (2018) coa dirección artística de Irene Silva. Tamén é responsable da mostra “Espazos roubados” (Deputación de Pontevedra, 2021) e do espectáculo Literarias, con Silvia Penas e Mariana Carballal. Como escritora ten publicados case unha ducia de libros, todos eles coa editorial Belagua, e acumula outros tantos premios e recoñecementos. Os contidos das súas publicacións van desde a poesía e o relato ata a novela, o álbum ilustrado, biografías, “artefactos” ―como ela mesma denomina o seu último libro, Bambú (2022)― ou ensaios coma María Vinyals. Un talento rebelde (2018), sobre o que nos falará no seu relatorio.