María Pardo Trapote
Unha soprano de Teis nos Estados Unidos
O 13 de xaneiro de 1892 naceu en Vigo María Pardo Trapote. A súa infancia transcorreu entre a quinta familiar do Troncal, no barrio vigués de Teis, e a cidade de Pontevedra, onde vivían seus avós maternos. Formouse primeiro na Sociedade Económica de Santiago e despois no conservatorio de Madrid, onde rematou con excelentes cualificacións os seus estudos de piano e canto. A partir de 1913 comezou a destacar como unha brillante artista lírica e participou nun concurso no que obtivo unha pensión para ampliar os seus estudos en Italia, cunha estancia no conservatorio de Milán.
Ler máis
podcast
FALADOIRO AQUÍ FALTAN PÁXINAS
María Pardo Trapote. Unha soprano de Teis nos Estados Unidos
Xoves 26 de setembro ás 19 h
Palacete das Mendoza. Pontevedra
Relatoras: María del Carmen Lorenzo Vizcaíno e Pilar de Saa
María del Carmen Lorenzo Vizcaíno
Nada na Coruña, comezou os seus estudos musicais no conservatorio desta cidade, onde obtivo o título superior de Profesora de Violín. Foi membro da Xove Orquestra Nacional de España (JONDE), da Escola de Altos Estudos Musicais (EAEM) e da Orquestra Xove da Sinfónica de Galicia (OSG). Completou os seus estudos de doutoramento na Universidade de Santiago de Compostela (USC), baixo a dirección de Carlos Villanueva, defendendo en 2010 o traballo de investigación tutelado Enrique X. Macías e a súa participación na movida viguesa (1976-1986), centrado no compositor, e en 2019 a súa tese doutoral A música no Teatro Principal de Santiago de Compostela (1840-1914), coa que obtivo a cualificación de sobresaliente cum laude.
Desde 2006 é a arquiveira musical da Real Filharmonía de Galicia, labor que compatibiliza coa de profesora na Universidade Internacional da Rioxa (UNIR) e coa de coordinadora da Comisión de Arquivos de Orquestras Sinfónicas da Asociación Española de Documentación Musical (AEDOM).
Tamén é investigadora e membro do Grupo Organistrum da USC, co que participa, entre outros, no proxecto de I+D+i "Galicia-América: Música civil, ideoloxía e identidades culturais a través do Atlántico (1800-1950)". Actualmente céntrase na recuperación das figuras galegas da lírica, nacional e internacional, entre as que se atopan M.ª Luisa Nache, Matilde Vázquez, María Pardo Trapote ou Dorinda Rodríguez, entre outras.
Pilar de Saa
Naceu en Pontevedra en 1966, nunha familia moi vinculada á cultura, á que pertencen varias personaxes célebres da cidade. Entre elas, a súa tía avoa, a artista lírica María Pardo Trapote, de quen Pilar lle escoitaba marabillada contar historias á súa familia desde ben pequena: a Ópera de Milán, o Teatro Real de Madrid, Boston... De América chegaban a través dela e doutros familiares cousas fantásticas que en España era imposible conseguir e, sobre todo, chegaba a aura fascinante daquela muller culta e libre rodeada de glamour e misterio. Xa de adulta, a curiosidade levou a Pilar a investigar e reunir documentación sobre a vida da súa tía avoa que vai compartir connosco neste episodio.