INMACULADA PAZ ANDRADE
Unha investigadora en loita contra os incendios
Inmaculada Paz Andrade foi unha científica incombustible que lles declarou a guerra aos incendios forestais. Con mentalidade inglesa e corazón profundamente galego, esta pontevedresa da parroquia de Lérez desenvolveu unha carreira investigadora pola que obtivo innumerables recoñecementos na comunidade científica, nunha especialidade pola que non sentía ningunha vocación cando empezou a estudar. Ela quería facer Medicina, pero a súa familia pensaba que esa non era carreira para unha muller. Entrou na Facultade de Ciencias por non quedar na casa e acabou introducindo a especialidade da microcalorimetría en España e converténdose na primeira muller en recibir o título de catedrática de Física na Universidade de Santiago de Compostela, entre outros moitos logros. Nun momento no que o acceso ao campo da investigación estaba reservado para os homes, esta pioneira foi quen de superar as barreiras impostas e de converterse en todo un exemplo inspirador para as novas xeracións de científicas.
podcast
FALADOIRO AQUÍ FALTAN PÁXINAS
Inmaculada Paz Andrade “Unha investigadora en loita contra os incendios”
Xoves 21 de marzo ás 19 h
Edificio administrativo da Deputación de Pontevedra
Relatora: Xoana Pintos Barral
Xoana Pintos Barral
Xoana Pintos Barral naceu en Compostela en 1960. O seu apego polo mar levouna a estudar Bioloxía na Universidade de Santiago de Compostela (USC), na que se especializou en Bioloxía Mariña.
Realizou estudos avanzados en microbioloxía e en historia da ciencia. É doutora pola USC e especialista en estudos sobre a análise do papel das mulleres na ciencia; desenvolve o seu traballo de doutoramento sobre as primeiras estudantes na universidade galega.
A posta en valor das achegas das científicas, o seu coñecemento, o estado actual da perspectiva de xénero na ciencia, a visión das mulleres de ciencias e as trabas que atoparon e atopan no seu camiño son os temas nos que centra o seu traballo actual e sobre os que publicou libros, capítulos e artigos.
Como divulgadora, publica artigos sobre historia da ciencia, bioloxía, e xénero e ciencia. Así mesmo, imparte charlas, comisaria mostras e participa en mesas, así como en actos que contribúen a estimular o interese das nenas pola investigación científica e técnica.