ERNESTINA OTERO
Mestra comprometida e inspiradora
Ernestina Otero Sestelo foi unha mestra de Redondela que traballou incansablemente por mellorar a calidade do ensino e, sobre todo, por estendelo a unha maior porcentaxe da poboación. Firme defensora dun modelo educativo renovador e dos dereitos da muller, puxo en marcha iniciativas coma os roupeiros e os comedores escolares para conseguir que as familias tamén enviasen as nenas á escola. A súa vida divídese entre os moitos logros profesionais alcanzados durante a Segunda República e as persecucións e represalias contra ela e a súa familia durante o franquismo por causa das súas ideas.
podcast
ROTEIRO
FALADOIRO AQUÍ FALTAN PÁXINAS
Ernestina Otero. “Mestra comprometida e inspiradora”
Xoves 10 de agosto ás 20 h
Alameda de Castelao. Redondela
Relatores: Manuel Puga Pereira e Montse Fajardo
Manuel Puga Pereira
Redondela, 1951
Licenciado en Ciencias Biolóxicas e Farmacia, e doutor en Ciencias pola Universidade de Santiago de Compostela (USC).
Inicia a súa vida profesional na USC, pero axiña se incorpora á industria farmacéutica (ICI-Farma, Zeneca Farma e AstraZeneca), na que desenvolve a maior parte da súa carreira como director técnico e industrial.
Paralelamente, foi membro do padroado de Fundación Empresa-Universidade Galega, da Xunta Directiva da Federación Empresarial da Industria Química Española e presidente da Fundación Galicia Empresa. Tamén ocupou as presidencias do Consello Social da USC e da Real Academia de Farmacia de Galicia.
Na actualidade é académico da Real Academia de Farmacia de Galicia, da Real Academia de Farmacia de Cataluña e da Real Academia Nacional de Farmacia, e está en posesión de diversas distincións, entre elas a Insignia de Ouro da USC.
Por outra parte, colabora activamente co mundo da cultura: preside a Fundación Penzol, é vicepresidente da Editorial Galaxia e da Fundación Otero Pedrayo e forma parte do padroado da Fundación Carlos Casares.
Ao longo da súa carreira publicou diversos traballos sobre temas relacionados coa edafoloxía e o medio natural, coa farmacia e a industria farmacéutica e coa súa vila natal, ademais dunha biografía de Ernestina Otero.
Montse Fajardo Pérez
Vilagarcía de Arousa, 1973
É licenciada en Ciencias Políticas e da Administración, pero a súa carreira profesional está vinculada ao xornalismo. Especializada en Memoria Histórica, formou parte do equipo redactor do programa “A memoria das mulleres” do Concello de Pontevedra e na actualidade traballa na Deputación de Pontevedra como técnica especialista nesta temática.
En solitario é a autora dos libros Matriarcas. Mulleres en pé de vida (2012), Un cesto de mazás. Memoria das vítimas do 36 e do tempo que veu (2015), Invisibles. Relatos do maltrato (2017), O escalón de Ulises. A Pontevedra dos afectos de María Victoria Moreno, a mestra que escribía libros (2018) e A vida incerta, biografía de Virxinia Pereira (2020).
Ademais, foi a comisaria da exposición itinerante “Rexas, mulleres baixo o terror franquista”, posta en marcha pola Deputación de Pontevedra en 2017 e a coordinadora das Xornadas contra a Impunidade que este mesmo organismo levou a cabo entre 2019 e 2020.
En 2018 foi galardoada co II Premio de Xornalismo Lueiro Rey polo seu artigo “O universo de Carlos”, que protagoniza un neno con autismo.