LA BELLA OTERO
Unha icona da belle époque
Bailarina, cantante, actriz e cortesá, La Bella Otero converteuse nunha das personaxes máis emblemáticas do París galante da belle époque. Mentiu, inventou e fabulou coma ninguén para esconder un pasado traumático que a obrigou a fuxir de Valga con só 12 anos, tras unha brutal violación. Construíuse unha historia perfectamente calculada para catapultala á fama, á fortuna e ao corazón de ricos e poderosos admiradores aos que xamais conseguiu entregarse por completo porque lle resultaba imposible confiar nos homes. Segundo ela mesma declarou, a súa verdadeira paixón foi o xogo. Morreu na Costa Azul, apartada do foco público, e con ela din que morreu tamén a propia belle époque.
podcast
ROTEIRO
FALADOIRO AQUÍ FALTAN PÁXINAS
A Bela Otero. Unha icona da belle époque
Encarna Otero
Encarna Otero Cepeda naceu en Santiago de Compostela o 29 de xullo de 1950. É historiadora, mestra e política nacionalista galega. Entre 1971 e 1976 residiu na cidade francesa de Toulouse, onde se licenciou en Historia en 1975 pola Universidade de Toulouse-Le Mirail. Desde 1970 milita activamente no nacionalismo. Durante a súa etapa en Francia participou no movemento antifranquista e coñeceu directamente a realidade do exilio. Desde 1982 forma parte do Consello Nacional do BNG e entre 1999 e 2003 foi primeira tenente de alcalde e concelleira delegada de Rehabilitación do Centro Histórico de Relacións co Consorcio e de Muller no Concello de Santiago. Tamén foi directora xeral de Fomento e Calidade da Vivenda durante o goberno bipartito da Xunta de Galicia. En 2010 volveu ás aulas do IES Eduardo Pondal de Santiago de Compostela para impartir docencia.
É autora de varios estudos académicos, de ensaios coma Anacos de esperanza, 2003, publicado por Edicións do Castro; novelas xuvenís coma O branco país sen neve ou A serea do mundo, publicados en 2008 pola Editorial Galaxia, ou de obras colectivas coma A ollada exterior do nacionalismo galego, publicada en 2011 pola Fundación Galiza Sempre. Ten colaborado e continúa colaborando en diferentes publicacións galegas coma A Nosa Terra, O Ensino, Andaina, ou A Festa da Palabra Silenciada, con diversos artigos sobre a muller na historia. É súa tamén a autoría das entradas da Bela Otero na Galipedia e no “Álbum de mulleres” do Consello da Cultura Galega.