O compost é un fertilizante natural para a terra que se obtén da degradación de restos de comida e vexetais mesturados con materiais leñosos e secos, que funcionan como estruturante. Trátase dun produto estable, de cheiro agradable e con moitas propiedades beneficiosas.
Propiedades químicas

• Aumenta a dispoñibilidade de nitróxeno (N), fósforo (P), potasio (K), ferro (Fe) e xofre (S) no solo
• Incrementa a eficiencia da fertilización
• Estabiliza o índice de acidez do solo (pH)
• Aumenta os macronutrientes e os micronutrientes
• Inactiva os residuos de praguicidas debido á súa capacidade de absorción
• Inhibe o crecemento de fungos e bacterias que lles afectan ás plantas

Propiedades físicas

• Actúa como soporte e alimento dos microorganismos
• Incrementa a capacidade de retención da humidade
• Retén enerxía calórica
• Mellora a porosidade, a permeabilidade e a aireación do solo
• Permite unha maior esponxosidade e retención de auga
• Mellora a estrutura do solo

Propiedades biolóxicas

• Reduce a erosión do solo
• Favorece a micorrización
• Intensifica a actividade microbiana

O compost pode ter diferentes aplicacións en función do seu grao de madurez e do tipo de cultivo ao que se destina.
O compost maduro distínguese pola súa textura terrosa, a súa cor escura e o seu cheiro a bosque. Principalmente úsase como fertilizante en cultivos, xardíns ou plantas domésticas. Así mesmo, mellora a estrutura do chan e favorece a capacidade de reter auga.
Proporcións

• En hortos, 2-3 kg/m2 de compost mesturado ou enterrado a uns 10-15 cm.
• En árbores, estender unha capa de 3 cm mesturado superficialmente ou ao redor do tronco en toda a superficie ocupada pola copa da árbore.
• En macetas, mesturar 1 parte de compost con 3 de terra antes de plantar.

Té de compost: no caso de precisar un extra de nutrientes, pódese utilizar en forma líquida. Unha posible opción é deixar macerar durante unha semana, remexendo de cando en vez, uns 3 kg de compost maduro en 10 litros de auga, preferiblemente de choiva, nun saco permeable. Aplicarase como rego ou diluído en auga, dependendo das necesidades da planta.