O título proposto para o simposio, Nélida Piñón. A Mestizaxe dos Soños e o Corazón, é unha síntese dos temas e dos títulos máis destacados da súa traxectoria, dado que ela mesma se ergueu sempre como firme defensora da mestizaxe, onde a memoria se mestura coa fantasía. A república dos sonhos, a súa obra máis recoñecida, traduciuse ao galego, e A épica do coração é o título dunha das súas obras de ensaio e do discurso que pronunciou na recepción como académica de honra na Real Academia Galega. Ela mesma é unha mestizaxe de culturas, conxugando á perfección na súa obra a parte espiritual e imaxinativa coa máis terreal e chea de paixóns.