A Deputación de Pontevedra, a través do Servizo de Benestar Social, pon en funcionamento este ano o programa “Provincia activa” 2025 coa finalidade de favorecer o envellecemento activo das persoas maiores da provincia de Pontevedra a través da súa participación en obradoiros temáticos.

Este programa conta cun orzamento de 145.916,20 euros e ten como finalidade favorecer a participación e a cooperación social, así como promover espazos de encontro e intercambio de experiencias que permitan fomentar a independencia das persoas maiores e así evitar o illamento e as situacións de soidade.

A institución porá á disposición das persoas xubiladas e pensionistas un total de 130 obradoiros, con 25 prazas en cada un, o que supón a participación de máis de 3.000 persoas. Así, ofértanse os seguintes obradoiros: Benestar Natural, Saúde en Movemento, Emociónate, Outra Vida, Con Ritmo! e Redeir@s. Cada un terá unha duración de 30 horas e impartirase en xornadas de entre unha a tres horas á semana.

Só se poderá adxudicar un obradoiro por entidade, que terá un custo de sete euros por persoa participante.