A Xunta de Goberno da Deputación vén de dar luz verde a unha achega da Liña 1 do Plan Concellos por preto de 70.000 euros (67.352 €) para Mondariz, que irá destinada á terceira fase da reforma integral da escola de Redo de Vilar, que está en proceso de converterse nun novo centro comunitario para a veciñanza da vila. En concreto, a achega permitirá sufragar algo máis do 24% das actuacións, mentres que o Concello completará o financiamento dos traballos cunha subvención de 211.275 euros do Ministerio de Transportes para rehabilitación de edificios de titularidade pública (PIREP local), no marco do Plan de Recuperación do Goberno estatal.

Con estes recursos realizarase a reforma enerxética da envolvente (solo, fachada, carpinterías e cuberta), incluíndo a substitución das tres ventás grandes da aula. Ademais, reformaranse as instalacións térmicas, dispoñendo dúas estufas de pellets, e a eléctrica e substituiranse as luminarias actuais por outras de baixo consumo. Tamén se instalará un sistema de renovación de aire eficiente con dous recuperadores de calor e 6 paneis fotovoltaicos con acumulación e repararase a estrutura existente en dúas zonas do forxado e no tellado, así como a fachada de granito. A actuación contempla limitar a acumulación do gas radón, crear un novo acceso ao fallado, dotar de novo mobiliario a varias salas, renovar a carpintería interior de todo o edificio, reparar e rematar os acabados interiores no soportal cuberto, no vestíbulo e en toda a zona da antiga vivenda, así como instalar unha baranda de protección e executar obras de axardinamento en toda a finca.

A través destes traballos complétase o proceso de transformación da escola de Redo, na parroquia de Vilar, nun centro socio-comunitario despois de ser reformada a súa cuberta nunha primeira fase e, nunha segunda, facer cambios na distribución interior para conectar os espazos de escola e de vivenda.