Encontro Pontevedra Literaria. Xuventude e Artes

Encontro Provincial

Pontevedra Literaria. Xuventude e Artes

“Vivir das letras”

PROGRAMA
INSCRICIÓN
PARTIPANTES E RESEÑAS

En directo

A Deputación de Pontevedra, a través do Servizo de Xuventude e Reto Demográfico, convoca anualmente os Premios Provinciais á Xuventude, coa finalidade de promover o talento e o esforzo da mocidade, estimular a súa creatividade e recoñecer o seu compromiso coa cultura, as artes, as ciencias e a investigación, entre outras. As solicitudes de participación aumentan cada ano en todas as categorías, pero sobre todo nas de “traballo literario breve” e “fotografía orixinal”, o que denota un especial interese polas iniciativas de creación literaria e artística.

Neste contexto, a Deputación de Pontevedra organiza o próximo mes de outubro un encontro literario e artístico, Pontevedra Literaria. Xuventude e Artes, co lema “vivir das letras”.

Este evento desenvolverase os días 17 e 18 de outubro, na zona acristalada do Edificio Castelao do Museo de Pontevedra, e nel participarán escritoras e escritores de traxectoria consolidada, así como as persoas galardoadas nas sete últimas edicións dos Premios Provinciais á Xuventude, librerías da cidade e da contorna, clubs de lectura, editoriais e persoas afeccionadas á lectura.

Este encontro, único na provincia, é unha grande oportunidade para que as persoas convidadas compartan as súas motivacións, relaten as súas experiencias no mundo literario e dean consellos e recomendacións para que se queira iniciar nesta disciplina, especialmente as mozas e os mozos con vocacións literarias.

Ademais, o encontro completarase con dúas exposicións: unha de fotografía, na que se amosarán as obras gañadoras das últimas sete edicións dos Premios Provinciais á Xuventude, e outra de pintura, que incluirá catro cadros realizados por mozas e mozos da provincia.

Programa do Encontro Pontevedra Literaria. Xuventude e Artes, “Vivir das letras”

Zona acristalada do Edificio Castelao do Museo de Pontevedra

17 de outubro, de 19 a 21 h
- Condutora da xornada: Susana Pedreira
- Actuación musical de Xacobe Medina (guitarra)
- Apertura por parte do presidente da Deputación, Luis López
- Intervención de Manel Loureiro
- Mesa redonda:
  - Rafa Cabeleira
  - Arantza Portabales
  - Ángela Banzas
- Preguntas e interacción co público asistente
- Ao rematar servirase un petisco na última planta do Edificio Castelao
18 de outubro, de 19 a 21 h
- Condutora da xornada: Bibiana Villaverde Rodríguez
- Actuación musical de Andrea García González (piano)
- Benvida por parte do deputado provincial Jorge Cubela
- Lectura do poema Aquí. Hoy. de Borges
- Intervención de Héctor Abad Faciolince: “A guerra e as letras”
- Mesa redonda:
  - Sandra Ferreiro García
  - Rodrigo Cota
  - Alexander Vórtice
  - Xulio Teixeira Rodríguez
- Preguntas e interacción co público asistente
- Ao rematar servirase un petisco na última planta do Edificio Castelao

Inscrición

Para inscribirte só tes que enviar unha mensaxe a xuventudereto@depo.es, indicando o número de persoas interesadas en asistir a cada unha das dúas xornadas.

PARTIPANTES E RESEÑAS

Héctor Abad Faciolince

Héctor Abad Faciolince

Héctor Abad Faciolince naceu en Medellín e estudou Lingua e Literatura Moderna na Universidade de Turín. É escritor e xornalista, coñecido polos seus libros Angosta, que obtivo en abril de 2005 na China o premio á mellor novela estranxeira, El olvido que seremos, sobre a vida e asasinato de seu pai, Héctor Abad Gómez, que recibiu o premio Casa de América Latina de Portugal á mellor obra latinoamericana e o Premio Wola-Duke de Dereitos Humanos.

É autor tamén das novelas La Oculta, e Salvo mi corazón todo está bien, entre outras.

Falaranos da súa próxima novela, que sairá do prelo en 2025
Ángela Banzas

Ángela Banzas

Natural de Santiago de Compostela, estudou Ciencias Políticas e da Administración na Universidade de Santiago, e cursou tamén o Máster de Administración de Empresas na Escola Europea de Negocios de Madrid.

Banzas dedicouse profesionalmente ao campo de consultoría da Administración pública, pero a súa paixón pola escritura levouna a destinar tamén o seu tempo a darlle vida ás súas historias.

En 2021 viu publicada a súa primeira novela, El silencio de las olas, que obtivo un grande éxito de público e vendas. La conjura de la niebla foi a súa segunda novela, e en 2023 publicou La sombra de la rosa.

El aliento en llamas é a súa última obra, coa que iniciou unha xira de presentación por toda España.
Rafa Cabeleira

Rafa Cabeleira

Nacido en Campelo (Poio), todo parecía indicar que o seu destino era arruinar o negocio de hostalería que rexentaran seus avós, pais e tíos, pero saltou a tempo do barco e púxose a escribir.

Comezou cun blog e non tardou en estrearse como columnista na sección de deportes de El País, fiel ao seu costume de empezar a casa polo tellado.
Actualmente tamén colabora noutros medios coma Diario de Pontevedra, RAC 1 ou a revista Jot Down, pero segue sentíndose un farsante dentro da profesión, sempre á espera de que alguén o descubra e lle poña fin á súa aventura.

Escribe sobre todo e sobre nada, co fútbol como escusa favorita para falar da vida e contarnos a súa.
Rodrigo Cota

Rodrigo Cota

Guionista de banda deseñada e cinema e escritor pontevedrés.

Autor das obras El inaudito secuestro de Mariano Rajoy (2012),con prólogo de Manuel Jabois, e David Cal, Támara Echegoyen, Juan José García Cota, Javier Gómez Noya(Deputación de Pontevedra, 2014), ilustrado con fotografías de Rafa Fariña, entre outros.

En 2009 recibiu o premio ao mellor guión do festival En Curto por A obsesión de Gustav Meyer,e en 2020 o Premio Puro Cora de xornalismo.
Sandra Ferreiro García

Sandra Ferreiro García

"Chámome Sandra Ferreiro García e nacín no ano 2000 ás beiras do Ulla. Namoreime da lingua e da arte de contar historias desde pequena, o que me levou a participar e gañar varios concursos literarios de relatos. Son lingüista e filóloga e agora tamén profesora, pero sempre me gustou considerarme escritora, talvez por iso o máis normal é atoparme perdida nalgunha das miñas historias."
Manel Loureiro Doval

Manel Loureiro Doval

Saltou á fama coa súa primeira novela Apocalipsis Z, un thriller de terror que comezou como un blog en internet. Despois desta novela publicou Los días oscuros e La ira de los justos.

Tras estas novelas editou El último pasajero, Fulfor, Veinte, La puerta e La ladrona de huesos.

Este ano gañou o Premio Fernando Lara coa súa novela Cuando la tormenta pase, número 1 en vendas e coa que está facendo nestes intres unha xira de presentación por distintos países hispanoamericanos.
Arantza Portabales

Arantza Portabales

É licenciada en Dereito pola Universidade de Santiago de Compostela e funcionaria da escala superior de finanzas da Xunta de Galicia.
Iníciase como escritora no ano 2013, cultivando o xénero do microrrelato.

En outubro de 2015 publicou o seu primeiro libro de microrrelatos A Celeste compreina nun anciño (Zaera Silvar, 2015). Ese mesmo ano, a súa novela en lingua galega, Sobrevivindo (Galaxia 2015), resultou vencedora do XV Premio de Novela por Entregas de La Voz de Galicia.

En 2017 o seu relato Circular C1: Catro Camiños-Embaixadores gañou a XVIII edición do Certame de Narración Breve da UNED. Tamén en 2017 o seu microrrelato As musas resultou gañador do Concurso da Microbiblioteca de Barberà del Vallès.

A súa segunda novela, Deixe a súa mensaxe despois do sinal (Galaxia, 2017), foi traducida ao castelán pola Editorial Lumen, ao italiano, ao hebreo e ao alemán, e levada ao teatro pola Compañía Tanttaka.

En maio de 2019 Galaxia tamén publicou a súa terceira novela, Beleza vermella, conxuntamente coa súa tradución ao castelán, e tamén en Italia co título Bellezza Rossa. Con esta novela inicia unha serie, cos inspectores Abad e Barroso como protagonistas, e publica La vida secreta de Úrsula Bas(2021), e a súa última novela El hombre que mató a Antía Morgade(2023).

Historias de mentes(2020) supón o seu reencontro co xénero curto e a evidencia de que mantén intactas as ganas de seguir contando historias, sexan estas do tamaño que sexan.
Xulio Teixeira Rodríguez

Xulio Teixeira Rodríguez

Avogado, profesor de dereito na Universidade de Vigo e escritor porriñés afincado en Pontevedra.

Ten publicado, en poesía, De amor e outros medos (2013), Os números viaxeiros (2023), do que é autor en conxunto coas súas dúas fillas, e no 2024 a novela ambientada en Pontevedra As vidas do río.
Alexander Vórtice

Alexander Vórtice

Poeta, novelista, columnista, editor e escritor

Colaborou en medios coma PontevedraViva, Diario de Pontevedra, Diario16, Crónicas PTV e Galicia Confidencial, e nas revistas culturais Falando con Letras, En tempos de Aletheia e Oceanum, entre outras, tanto de ámbito nacional coma en hispanoamérica.

As súas obras publicadas ata o momento son Destilería Ocaso (2004), Neurose tremens (2005), Material de soños (2008), Dios y otros superhéroes (2013), Atrofiadas as estrelas (2015), Crónica de un hombre bueno(2016), Vegetaciones carnívoras (2017), Tempa maltreita (2019) e Diagnóstico interior (2021).

Tamén é un dos autores do anuario turístico Galicia Selecta (2008) xunto cos artistas Yolanda Castaño, Manolo Ruibal, Cristina Pato, Celso Bugallo, Andrés Meixide e o ministro de Cultura César Antonio Molina; publicación que logrou o premio á mellor publicación do ano a nivel nacional, galardón outorgado pola AEEPP.

ACTUACIÓNS MUSICAIS

Andrea García González

Andrea García González

É unha pianista e cantante de Marín, afincada en Pontevedra, que se define a ela mesma como unha artista do máis versátil, acostumada a interpretar repertorio clásico, folk, pop, rock e indie. Na actualidade compaxina as súas actividades de intérprete coa de profesora de canto e disciplinas teóricas en Quodlibet, centro que dirixe na cidade de Pontevedra.
Xacobe Medina

Xacobe Medina

Mozo pontevedrés, escritor e músico

Estudou violín e viola no CMUS Manuel Quiroga de Pontevedra, e aos 14 anos era violinista titular da Orquestra Infantil da Sinfónica de Galicia. Entre o 2015 e 2016 compuxo pequenas obras que foron interpretadas polo coro Luís García Limeses e pola orquestra do Conservatorio de Pontevedra. Graduouse en Filosofía na Universidade de Santiago de Compostela en 2022 e a continuación realizou un máster na mesma universidade. Comezou a publicar en 2017. É autor da canción Tan largo el amor.