A Deputación de Pontevedra facilitará o material deportivo incluído no programa “DEPOcomparte” en condicións idóneas para o seu uso e, no momento da súa retirada, asesoraráselles aos solicitantes para utilizalo.

O servizo de préstamo “DEPOcomparte” é de carácter gratuíto; non obstante, os solicitantes faranse cargo dos gastos derivados do transporte e do persoal necesario para a recollida, a instalación, a retirada e o retorno do material.

Non se aceptarán as solicitudes realizadas con máis de dous meses de antelación respecto á data de desenvolvemento da actividade.

As entidades locais ou os clubs deportivos beneficiarios asumen os seguintes compromisos:

• Devolver o material prestado no mesmo estado no que se lles entregou, sempre dentro do prazo previsto no momento da reserva.
• Asumir, en todo caso, os gastos de reparación cando se produza unha deterioración grave deste.
• Responsabilizarse da instalación do material e dos danos sobre terceiras persoas que esta poida ocasionar.

O material solicitarase a través da web da Deputación cubrindo o formulario de solicitude. Esta será recibida polo persoal encargado da xestión dos materiais para eventos deportivos, que responderá, se é o caso, afirmativamente e indicará a data e o horario para recoller o material e para devolvelo.

Non recoller e/ou non entregar o material na data e na hora establecidas pola Deputación de Pontevedra unha vez concedido o préstamo implicará a aplicación de penalizacións en futuras reservas.