A deputada provincial María Ramallo visitou xunto coa alcaldesa, Leticia Santos, o pavillón do Rosal, en Moaña, onde anunciou que a Deputación aprobará na Xunta de Goberno deste venres unha inxección económica de preto de 200.000 euros para a mellora destas instalacións deportivas. Farao a través do II Plan Extraordinario de Infraestruturas Deportivas, que está dotado con oito millóns de euros (o dobre que na súa primeira edición), un programa co que a institución provincial está a transformar e modernizar os equipamentos deportivos da provincia. De feito, ao abeiro deste plan, Moaña recibirá este ano un 70% máis de recursos que na anterior edición, cando se beneficiou de 116.000 € para a construción do skatepark do Casal, unha obra que comezou o pasado mes de febreiro.

Ramallo deu conta dos traballos que se realizarán con estes recursos (concretamente 196.556 €), que permitirán reparar e impulsar actuacións para mellorar as condicións e prestacións do pavillón, que precisan na actualidade dunha serie de reparacións. En concreto, na zona de vestiarios vanse renovar todas as carpinterías interiores e eliminar catro das unidades existentes na actualidade e instalar un novo sistema de armarios e bancos con perchas e espazo para zapatos. Ademais, procederase á instalación de novas luminarias led sobre a pista de xogo e dun sistema de ventilación mecánica,  así como un novo xogo de porterías, un sistema motorizado nas canastras xa existentes, nova impermeabilización e cuberta protectora de grava, substituirase a zona exterior axardinada por pavimento de formigón, e realizaranse outras actuacións como hidrolimpeza da fachada sur, a retirada de panelado de madeira, a execución dun murete, o lixado e limpeza do pavimento deportivo e das varandas existentes ou o pintado de diferentes zonas.

 “Estamos co deporte e estamos cos concellos, e esta actuación é unha boa mostra diso”, sinalou María Ramallo, que lembrou que “a dotación e mantemento das instalacións deportivas son moi custosos e por iso estamos facendo un esforzo excepcional nesta materia con programas como o Plan Extraordinario de Infraestruturas Deportivas”. A deputada aproveitou a ocasión para lembrar que o deporte é un dos eixos prioritarios do goberno da Deputación, de xeito que “este ano temos máis recursos que nunca para o deporte. Temos un modelo claro para o territorio que se basea en converter Pontevedra na provincia deporte e no grande estadio deportivo do mundo”.

Galerias de imaxes