O presidente da Deputación de Pontevedra, Luis López, salienta o obxectivo compartido entre o organismo provincial e a Mancomunidade do Salnés para seguir avanzando de xeito controlado e planificado cara un destino turístico sustentable e desestacionalizado que poña en valor activos turísticos propios do territorio como o patrimonio natural ou o enoturismo. Fíxoo na presentación do Plan Estratéxico 2024-2028 de Turismo do Salnés , que tivo lugar este mércores no adega Lagar de Pintos de Ribadumia. “É importante ter unha folla de ruta para saber que somos, que queremos ser e como podemos conseguilo. Nisto consiste un plan estratéxico coma o da Mancomunidade do Salnés, polo que quero darlle os parabéns ao equipo de goberno e salientar os puntos en común en materia de turismo que compartimos as dúas institucións, co enoturismo como unha das nosas máis grandes fortalezas”, sinalou o mandatario provincial.

Un documento estratéxico que recolle os obxectivos en materia de turismo así como as ferramentas e medidas a tomar para acadar as metas marcadas. Unha estratexia comarcal que sirve de complemento á folla de ruta que tamén ten en marcha a Deputación para seguir consolidando ás Rías Baixas como un destino moderno, sustentable e competitivo. “Igual que a Mancomunidade do Salnés, na Deputación tamén presentamos a comezos deste verán a nosa propia folla de ruta. Leva o nome de Estratexia Rías Baixas Turismo 61. Trátase dun plan para poñer en valor os atractivos dos 61 concellos da provincia, para desfrutar de experiencias 100 % Rías Baixas os 365 días do ano e para garantir un turismo sustentable que foxe das masificacións,        que prima o contacto coa natureza sen alterala e que ve no turista un aliado e non un inimigo”, explicou o presidente provincial.

Neste sentido, Luis López fixo fincapé no bo momento que atravesa o turismo na provincia de Pontevedra, cunhas cifras de viaxeiros que non deixan de medrar, un recoñecemento internacional cada vez maior e un interese pola oferta natural, cultural e de ocio das Rías Baixas que amosan operadores turísticos de rexións moi diversas. “Vivimos nun verdadeiro paraíso, e iso que ata hai ben pouco nin nós nolo críamos. Como íamos pensar que a xente podería preferir visitar antes as praias das Illas Atlánticas cas do Caribe, facer surf na Lanzada e non en Hawai ou desfrutar dos pazos e adegas que temos aquí para facer unha cata e non ir á Toscana”, enumerou o dirixente. Con todo, fixo tamén fincapé na importancia de “comunicar” de xeito apropiado os atractivos da comarca e da provincia para seguir impulsando un turismo de calidade, un obxectivo que persegue a Deputación cando participa en foros, encontrou ou congresos especializados con actores do turismo en distintos lugares da España e do mundo.

“O mundo está desexoso de vivir experiencias 100 % Rías Baixas e con estratexias definidas como as da Mancomunidade do Salnés e da Deputación poderemos facerlle chegar o noso catálogo infinito e dicir que a comarca do Salnés e a provincia son un destino para desfrutar os 365 días do ano, para mollar os pés nas augas das nosas praias ou termas e, por suposto, para mergullarse nunha forma de vivir que nos fai únicos. Traballando xuntos, tendendo pontes e compartindo obxectivos, chegaremos á meta”, concluíu o presidente da Deputación.

Galerias de imaxes