A Deputación de Pontevedra impartirá neste mes de xullo dous cursos para formar aos nenos en competencias dixitais, unha proposta que se enmarca dentro do proxecto "CRI-TIC, Infancia e Xuventude con criterio dixital" da Fundación Esplai Cidadanía Comprometida, que ten como obxectivo principal favorecer a adquisición de competencias dixitais, buscando a inclusión dixital desde a infancia. Os cursos, que se desenvolverán entre o 1 e o 22 de xullo, están enfocados a nenos de 9 a 11 anos, por un lado, e de 14 a 17, polo outro, e están deseñados para ensinarlles conceptos básicos de ferramentas informáticas, usos seguro e responsable de Internet, programación, robótica educativa, impresión 3D, ou realidade virtual.

Cada un dos cursos, que teñen como obxectivo desenvolver habilidades como a creatividade, o pensamento crítico e o traballo en equipo a través de actividades lúdicas e participativas, consta dun total de cinco etapas, nas que o alumnado deberá superar un total de seis misións cunha duración estimada de 60 minutos. Desta maneira, o primeiro dos cursos, de competencias básicas, é para nenos de 9 a 11 anos e desenvolverase de luns a venres de 11:30 a 13:30 horas. Os cativos descubrirán os beneficios das TIC, as fake news, que é a identidade dixital e a "netiqueta", así como a previr o ciberacoso, protexer os seus datos persoais e dispositivos, ou sobre bibliotecas dixitais, ferramentas de deseño e participación cidadá.

O segundo dos cursos, o que está enfocado a rapaces de 14 a 17, desenvolverase tamén de luns a venres de 9:30 a 11:30 horas e, neste caso, aprenderán sobre redes sociais e saúde mental, protección de datos persoais e privacidade, identidade, pegada dixital e "netiqueta", ocio saudable, ciberseguridade e prevención do ciberacoso, creatividade dixital e busca de emprego.

Ámbalas dúas iniciativas, que terán lugar do 1 ao 22 de xullo, celebraranse na aula CeMIT de Pontevedra, situada no Edificio Administrativo da Deputación. Os interesados en asistir aos cursos poden inscribirse ata o vindeiro 28 de xuño a través do correo electrónico cemit.pontevedra@xunta.gal.