A Deputación de Pontevedra acaba de aprobar unha nova axuda de máis de 40.000 euros ao abeiro do Plan Extraordinario de Infraestruturas Deportivas, dotado con 4 millóns de euros, para o Concello de Mondariz. Con estes recursos, o Goberno local realizará obras de mellora na piscina municipal.

O Concello de Mondariz destinará esta achega de 42.272 euros a mellorar tanto a piscina municipal como os vestiarios e a contorna da mesma, unha instalación que leva sen empregarse desde o inicio da pandemia polo covid-19, o que levou a que se atope en mal estado na actualidade e sexa necesaria unha reparación e actualización. En concreto, procederase a instalar unha nova acometida de auga, a sanear o pavimento na contorna da piscina, a sementar céspede, pintar os muros e reparar o grupo filtrante de auga.

O Plan Extraordinario de Infraestruturas Deportivas da Deputación, dirixido aos 59 concellos da provincia de menos de 50.000 habitantes, mobilizou ata o momento preto de 2,6 dos 4 millóns de euros do orzamento total, con achegas, ademais de para Mondariz, para A Cañiza, A Estrada, A Illa de Arousa, A Lama, Agolada, Arbo, As Neves, Baiona, Barro, Campo Lameiro, Cangas, Catoira, Cerdedo-Cotobade, Covelo, Crecente, Dozón, Fornelos de Montes, Gondomar, Lalín, Marín, Meaño Meis, Mondariz-Balneario, Moraña, O Rosal, Oia, Pazos de Borbén, Poio, Ponte Caldelas, Pontecesures, Redondela, Rodeiro, Salceda de Caselas, Salvaterra de Miño, Silleda, Soutomaior, Tui, Valga, Vila de Cruces, Vilaboa, Vilagarcía e Vilanova.