O presidente da Deputación de Pontevedra, Luis López, participou este xoves na presentación dunha nova competición deportiva na que destacou o apoio que lles brinda o organismo provincial ás e aos deportistas da provincia en forma de subvencións. O dirixente resaltou que as axudas para deportistas de alto nivel incrementáronse este ano nun 10 % e pasaron desde os 250.000 ata os 275.000 euros. Ademais, ao ser ano olímpico, convocarase unha nova subvención para olímpicos e paralímpicos dotada con 125.000 euros. “Organizamos competicións deportivas de gran calado e tamén axudamos aos nosos deportistas de alto nivel”, remarcou o titular do Goberno provincial.

Así mesmo, Luis López confirmou o apoio da Deputación á organización da primeira edición do Criterium Gustavo Dacal como unha nova mostra do compromiso do Goberno provincial co fomento da actividade física, co apoio aos clubs e coa inclusión. Trátase dunha competición promovida polo Club Atletismo Rías Baixas que se realizará o vindeiro sábado no Centro Galego de Tecnificación Deportiva. “O apoio da Deputación á primeira edición deste Criterium Gustavo Dacal non pode faltar, sería ir en contra dos nosos principios”, confirmou Luis López, quen reiterou a man tendida do seu Goberno para cooperar co tecido deportivo da provincia en eventos deste tipo, que promoven o deporte entre persoas de todas as idades e fomentan a inclusión das persoas con discapacidade.

A competición, que terá lugar na quenda de tarde, consistirá nun conxunto de probas de lanzamento adaptado para deportistas internacionais, aínda que tamén poderán participar atletas federadas e federados a partir de 16 anos de idade e atletas de deporte adaptado. Así mesmo, para menores de 14 anos haberá unha carreira curta. A organización prevé a participación de, aproximadamente, 300 atletas entre todas as diferentes disciplinas do programa de competición.

Durante a presentación, Luis López destacou o traballo que se realiza no CGTD e tamén o labor do Club Atletismo Rías Baixas na promoción do deporte de base. Con todo, Luis López quixo facer unha mención especial a Gustavo Dacal, co que mantén unha estreita relación a raíz da súa enfermidade e traslado desde México a Galicia. “Agora todo o seu coñecemento e todo o que el supón pono á disposición de toda a xuventude. É un exemplo, foino cando foi campión de España dez veces e éo agora por ese espírito de sacrificio que demostrou e pola visibilidade que lle dá ao deporte que practica”, agradeceu o presidente.

Galerias de imagenes