As xornadas “Alzheimer de preto”, organizadas pola Federación Atlántica de Asociacións de Familias de Persoas con Alzhéimer e outras demencias (FADEAL) e a Deputación de Pontevedra, continúan o seu percorrido pola provincia e chegarán esta semana a seis concellos: Oia, Meaño, Sanxenxo, Gondomar, Vila de Cruces e Silleda. A través desta iniciativa, para a que a institución provincial achega 15.000 euros, organizaranse sesión formativas sobre esta enfermidade nos 61 concellos da provincia.

En concreto, este luns 25 de novembro o proxecto chega a Oia, onde terá lugar unha segunda xornada, despois da celebrada o pasado día 21, de 16:30 a 18:30 horas na Sala Aula Mentor do Concello, e a Meaño, de 16:00 a 20:00 horas no Centro Social de Dena. Ademais, o mércores 27 terá lugar unha xornada en Sanxenxo, de 10:00 a 14:00 horas na Casa de Cultura de Adina, e o xoves 28 celebrarase en tres concellos: en Gondomar, de 16:00 a 20:00 horas no Edificio Neural e xefatura da Policía Local; en Vila de Cruces, de 10:00 a 14:00 horas no Auditorio Municipal Xosé Casal, e en Silleda, de 16:00 a 20:00 horas no Centro Social dos Maiores.

O obxectivo destas xornadas é que familias coidadoras, persoas diagnosticadas e a poboación en xeral coñezan de preto a enfermidade, a súa evolución ou as pautas para facilitar o día a día dos doentes, isto é, información, asesoramento e orientación a todas as persoas interesadas de todos os recunchos da provincia, atendendo especificamente as persoas que residen no rural. Concretamente, abordaranse os primeiros pasos tralo diagnóstico desta ou outras enfermidades neurodexenerativas, darase orientación sobre recursos asistenciais e sanitarios, tratamentos farmacolóxicos e non farmacolóxicos, así como facilitaranse novidades en canto a investigación, pautas para o manexo no fogar ou fóra del, ou tramitación documental e asesoramento legal.

O proxecto financiado pola Deputación está a ser xestionado a través das entidades asociadas da federación, que serán as encargadas de realizar as sesións informativas ao longo da provincia: a Asociación de Familiares de Enfermos de Alzhéimer e outras demencias de Pontevedra (AFAPO), a Asociación de Familiares de Persoas con Alzhéimer e outras demencias da Comarca do Morrazo (AFAMO), a Asociación de Familiares de Enfermos de Alzhéimer e outras Demencias de Galicia (AFAGA) e a Asociación de Familiares de Enfermos con Alzhéimer (AFASAL).