A Deputación de Pontevedra acaba de aprobar axudas aos concellos de Marín e Poio ao abeiro do Plan extraordinario de infraestruturas deportivas por importe de máis de 54.000 euros. Ata o momento, o Goberno provincial xa mobilizou máis de 770.000 euros dos 4 millóns de orzamento total do plan, que se abriu a todos os concellos de menos de 50.000 habitantes da provincia. Polo de agora xa se aprobaron recursos para Pazos de Borbén, Barro, Cerdedo-Cotobade, Redondela, Poio, Arbo, Crecente, Meis, Catoira, Cangas, Salceda de Caselas, Marín e Lalín.

Por unha banda, o Concello de Marín recibe unha achega de 48.382,39 euros deste Plan extraordinario coa que sufragará o 100 % do orzamento do proxecto para mantemento e mellora do parque de patinaxe situado no porto, así como tamén do acceso a esta infraestrutura. As achegas provinciais permitirán reparar o deterioro tanto polo uso das instalacións coma polas inclemencias meteorolóxicas tras máis dunha década habilitado.

No apartamento de mantemento contémplase o lavado dos muros de peche, do paso subterráneo e das superficies exteriores adxacentes, a reparación dos módulos de formigón, e de varias bancadas e mais a substitución das rexas de recollida de augas pluviais e das tapas das arquetas. No capítulo de melloras, procederase a repavimentar o chan e a substituír tanto a varanda metálica da bancada do nordeste coma os módulos de aceiro colocados sobre as escaleiras. Por último, limparase o paso subterráneo que dá acceso a esta infraestrutura. Con estas actuacións, a Deputación de Pontevedra e o Concello de Marín permitirán que a actividade que se realiza neste parque de patinaxe, ademais de mellorar a súa aparencia estética, sexa máis seguro, variado e confortable.

Pola súa parte, o Concello de Poio recibe unha achega de 6.000 euros para a subministración e instalación dun programa informático de xestión e un sistema de control de acceso no seu ximnasio municipal, situado no lugar da Seca. Instalaranse tornos na zona da entrada e tamén se expedirán un milleiro de tarxetas para persoas abonadas. Deste xeito evitarase que o persoal monitor e do centro teña que vixiar que non se produzan entradas de socias e socios sen abonos en vigor, para poder centrarse nas súas funcións pedagóxicas.

O Concello de Poio recibiu máis de 105.000 euros do Plan extraordinario de infraestruturas deportivas da Deputación, sumándose a este investimento outros dous xa concedidos anteriormente para a reparación dos vestiarios do campo de fútbol da Seca (48.503,14 euros) e a instalación dun pump track (51.027,27 euros).