A Deputación de Pontevedra acaba de aprobar unha nova axuda de 35.000 euros ao abeiro do Plan Extraordinario de Infraestruturas Deportivas, dotado con 4 millóns de euros, para o Concello de Pontecesures. Con estes recursos, o Goberno local procederá a reformar os vestiarios do pavillón polideportivo municipal.

O Concello de Pontecesures destinará esta achega de 35.522 euros a acometer estas obras de mellora, que inclúen a reorganización dos espazos dos vestiarios dos equipos (dous para cada un), ampliando a zona de duchas e de cambiadores. Renovaranse os acabados das paredes, solos e os aparatos sanitarios existentes, así como as instalacións de fontanería, electricidade e sinalización de emerxencia. A finalidade é adaptar e ampliar os espazos ás necesidades actuais e adecualos para que sexa accesibles ás persoas con mobilidade reducida.

O Plan Extraordinario de Infraestruturas Deportivas da Deputación, dirixido aos 59 concellos da provincia de menos de 50.000 habitantes, mobilizou ata o momento preto de 2,3 dos 4 millóns de euros do orzamento total, con achegas, ademais de para Pontecesures, para A Cañiza, A Estrada, A Illa de Arousa, A Lama, Agolada, Arbo, As Neves, Baiona, Barro, Cangas, Catoira, Cerdedo-Cotobade, Covelo, Crecente, Fornelos de Montes, Gondomar, Lalín, Marín, Meaño, Meis, Mondariz-Balneario, Moraña, O Rosal, Oia, Pazos de Borbén, Poio, Redondela, Salceda de Caselas, Salvaterra de Miño, Silleda, Soutomaior, Valga, Vila de Cruces, Vilaboa, Vilagarcía e Vilanova.