O Pleno da Deputación aproba a modificación das bases do “Programa PON2030” para favorecer o aforro dos concellos
29/09/2023
O Pleno da Deputación aprobou este venres, na súa sesión ordinaria, a modificación das bases do “Programa provincial de infraestruturas e dotacións singulares para a execución da Axenda 2030” (PON2030) para favorecer o aforro dos concellos. Un apoio aos gobernos locais que é unha das liñas mestras marcadas polo actual Goberno provincial.
O cambio aplícase na base vixésima do regulamento. A partir de agora, este punto recolle que “as subvencións que se concedan no marco destas bases admiten a compatibilidade con outras axudas públicas, incluídos os fondos europeos”, pero a principal diferenza está en que “no caso de que se obteña financiamento adicional, este reverterá no 100 % da achega municipal”.
Antes desta modificación, os concellos tiñan que achegar sempre unha porcentaxe do orzamento total do proxecto, que non adoitaba superar o 30 % e, se había achegas doutras administracións, salvo os fondos europeos, á marxe do Concello e da Deputación, as achegas de ambas as institución minorábanse de xeito proporcional. Con este cambio, o primeiro en reducir a súa achega ata cero, se é posible, será o Concello e, de seguir existindo financiamento adicional, minorarase despois a achega da Deputación.
Tamén se aprobou a modificación de crédito por valor de 28.283 euros, procedentes de fondos do remanente líquido de tesourería, para concederlle unha subvención nominativa urxente ao Concello de Arbo e así financiar unha parte da obra de reparación da rede de pluviais do polígono empresarial do municipio danada o pasado verán por un incendio forestal. Esta contribución adiantada pola Deputación é a contía que tiña que achegar o Concello dun total de 56.566 euros, que é o orzamento total da obra. Estes fondos deduciránselles ao Concello de Arbo do plan de investimentos do próximo ano 2024.
O primeiro punto da orde do día, referido á modificación do cadro de persoal e relación de postos de traballo, saíu adiante cos votos favorables das e dos 14 deputados do grupo. Un acordo que supón a creación dunha praza de axente de emprego e desenvolvemento, unha praza de técnica ou técnico auxiliar en preimpresión, dúas prazas de condutora ou condutor maquinista e dúas prazas de auxiliar técnica ou técnico xurídico.
Ademais, amortízase un posto de persoal laboral fixo de técnica ou técnico auxiliar de preimpresión, dúas prazas de persoal funcionario de oficial de infraestruturas e servizos e unha praza de persoal funcionario de técnico da Administración xeral.
O Pleno tamén sacou adiante a aprobación dun novo regulamento para a prestación do servizo de venda de embrións bovinos pola Finca Mouriscade para garantir a transparencia e a igualdade de acceso á compra por parte das e dos gandeiros e evitar posibles actos fraudulentos.
Do mesmo xeito, o Pleno acordou a transferencia de tres treitos de tres estradas aos concellos polos que transcorren. Son a EP-2802 de acceso a Calvos en Fornelos de Montes, a EP-9401 entre a travesía de Meis, San Salvador e o enlace coa autovía AG-41 en Meis, e dous treitos da EP-4006 entre Ponteareas a As Neves no termo municipal de Ponteareas.
O debate rematou coa moción do grupo popular relacionada co rexeitamento á tramitación dunha eventual lei de amnistía. O Pleno da Deputación rexeita calquera tipo de amnistía ou indulto xeneralizado para calquera grupo de persoas, independentemente do seu delito; considera que o imperio da lei é a expresión da vontade popular, tal como se recolle na Constitución, e anima os dous partidos maioritarios do Estado a buscar acordos que eviten que a sociedade española se vexa sometida ás condicións ilegais de partidos independentistas.
Antes fora rexeitada a moción do grupo socialista para instarlle ao Goberno provincial a que mantivese o Plan Concellos deseñado polo anterior Goberno.