O presidente da Deputación de Pontevedra, Luis López, sinala a alianza e cooperación entre as administracións do sur provincia e do norte de Portugal como a mellor fórmula para avanzar cara melloras na calidade de vida da veciñanza, na competitividade do tecido empresarial e nas infraestruturas en ambos os dous lados do río Miño. Fíxoo este xoves nun encontro de traballo en Valença do Minho co novo director da Agrupación Europea de Cooperación Territorial (AECT) Río Minho, Jose Manuel carpinteira; no que tamén participou Roberto Carrero, deputado de Cooperación Transfronteiriza, alcalde da Guarda e subdirector desta entidade.

“Este encontro é moito máis ca unha simple reunión de traballo. É a mostra da unión e colaboración entre 26 concellos aos que o río Miño non os separa, ao contrario, os une. É  a demostración de que a cooperación entre administracións, mesmo de países distintos, é a vía máis rápida para mellorar a calidade de vida das persoas. E é o sinal da alianza entre dúas rexións que traballan xuntas para ofrecer mellores servizos, impulsar a súa economía e modernizar as súas infraestruturas”, subliñou o presidente da Deputación con motivo deste acto.

A AECT Río Minho ten en marcha un amplo abano de proxectos e actividades dirixidas a dinamizar a vida cultural, social e económica para cuxa execución a Deputación achegará este ano un total de 130.000 euros. Uns fondos que servirán para poñer en marcha iniciativas como a redacción do proxecto para a construción dunha travesía peonil entre As Neves e Monçao, cunha achega provincial de 47.700€; a posta en marcha dun programa de mobilidade sustentable con bicicletas eléctricas que conecte núcleos urbanos de Salvaterra, Tomiño, Tui, Valença, Monçao e Vilanova de Cerveira; a organización de eventos culturais e deportivos a un e outro lado da fronteira ou o desenvolvemento turístico da rexión a través da marca Visit Río Minho, que conta cun orzamento total de 2 millóns de euros.

Ademais destes programas comúns, a alianza entre as administracións pontevedresas e lusas resulta fundamental tamén para conseguir a execución de proxectos estratéxicos como a construción dunha liña ferroviaria de alta velocidade entre Vigo e Porto no menor tempo posible, un obxectivo prioritario para a Deputación e as administracións destas rexións que xa firmaron un manifesto para poñer prazos e recursos concretos para comezar as obras. “Non só poñemos en marcha programas colaborativos no eido da sustentabilidade ou cooperación transfronteiriza, tamén traballamos unidos para que proxectos clave e estratéxicos como como a liña ferroviaria de alta velocidade entre Vigo e Porto sexa canto antes unha realidade”, defendeu Luis López.

Neste sentido, ve o presidente provincial no novo director da AECT Río MInho, Jose Manuel Carpinteira, un apoio sólido e leal para acadar as metas fixadas ao ser “un municipalista convencido e un firme defensor da cooperación transfronteiriza, formando un equipo excelente co deputado Roberto Carrero, para conseguir poñer en marcha proxectos estratéxicos”, concluíu o presidente da Deputación.